फोनिजया राष्ट्रिय भेलाय् नेवा– ताम्सालिङ समावेशी सञ्चार घोषणा पत्र जारी
नृपेन्द्रलाल श्रेष्ठ | थिंलागा चर्तुदशी ११४० (दिसेम्वर २५२०१९)
नेपाल आदिवासी जनजाति पत्रकार महासंघ (फोनिज)या राष्ट्रिय भेला २०७६ पुष ६ व ७ गते सिन्धुलीया ऐतिहासिक थाय् सिन्धुलीगढीइ ‘नेवा– ताम्सालिङ समावेशी सञ्चार घोषणा पत्र–२०७६’ १३ बुँदे घोषणपत्र जारी याना क्वचाःगु दु ।
राष्ट्रिय भेलाया उलेज्या समारोहया प्रमुख अतिथि कथं प्रदेश नम्बर ३ या आन्तरिक मामिला तथा कानूनमन्त्री माननीय शालिकराम जम्कट्टेल, विशेष अतिथि कथं नेपाल पत्रकार महासंघया अध्यक्ष गोविन्द आचार्य, फोनिजया सल्लाहकार, सिन्धुलीया प्रदेशसभा सदस्यपिन्स ब्बति काःगु खः ।
उगु भेलां १३ बुँदे ‘नेवा– ताम्सालिङ समावेशी सञ्चार घोषणा पत्र–२०७६’ जारी याना क्वचाःगु खः । राष्ट्रिय भेलाय् संगठनया महासचिव मनोज घर्तीमगरं न्ह्यब्बःगु संगठनात्मक प्रतिवेदन तथा कार्ययोजना सम्बन्धी प्रस्ताव व कोषाध्यक्ष अमरध्वज लामां न्ह्यब्बयादिगु आर्थिक प्रतिवेदन तथा कार्ययोजना सम्बन्धी प्रस्ताव सर्वसम्मतं पारित जुगु खः ।
भेलाय् उपाध्यक्ष लक्की चौधरीं न्ह्यब्बयादिगु प्रकाशन सम्बन्धी प्रस्ताव, उपाध्यक्ष देविका घर्तीमगरं न्ह्यब्बयादिगु आदिवासी जनजाति महिला पत्रकार सम्बन्धी प्रस्ताव, संगठन सचिव मिलन लिम्बूं न्ह्यब्बगु संगठनात्मक कार्य सम्बन्धी थप प्रस्ताव, संस्थागत सचिव जगत दोङं न्ह्यब्बगु संस्थागत सदस्य संस्था सम्बन्धी प्रस्ताव व अल्पसंख्यक सचिव कमान देवानं न्ह्यब्बगु आदिवासी जनजाति अल्पसंख्यक पत्रकार सम्बन्धी प्रस्ताव सर्वसम्मतं पारित जुगु खः ।
उगु राष्ट्रिय भेलां फोनिजया न्हुगु दुजःया लागि २०७६ माघ १ गते निसे व सदस्यता नवीकरणया लागि फागुन १ गते निसे शाखाय् आवेदन आह्वान यायेगु निर्णय याःगु खः ।
