फ्रान्सं बेलायतलिसेया रक्षा वार्ता रद्द यात
ञंलाथ्व चतुर्दशी ११४१, असोज ४ सोमबाः
अमेरिका, अष्ट्रेलिया व बेलायतदथुइ एशिया प्रशान्त सुरक्षा सहमतिलिपा तं चाःगु फ्रान्सं बेलायतलिसेया वार्ता मयायेगु धागु दु ।
बेलायत व फ्रान्सया रक्षामन्त्रीदथुइ च्वनी धयातःगु वार्ता आवलिं मजुइगु फ्रान्सं धागु दु । बेलायती रक्षामन्त्री बेन वालेन्स व फ्रेञ्च रक्षामन्त्री फ्लोरेन्स पार्लेदथुइ थ्वहे वालय् लण्डनय् वार्ता जुइ धयातःगु खः ।
तर आःवयाः फ्रान्सं वार्ता मयायेगु घोषणा याःगु दु । त्रिदेशीय सम्झौतालिपा अष्ट्रेलियां फ्रान्सलिसे सन् २०१६ लय् ३७गू अर्ब डलरय् १२गः पनडुब्बी न्यायेगु सहमति हाचाँ गायेवं फ्रान्स तं चाःगु खः ।
सुरक्षा सहमति कथं आः अष्ट्रेलियां अमेरिकी पनडुब्बी न्याइ । उगु सम्झौतायात फ्रेञ्च विदेशमन्त्री जाँयब्स ल दरियनं ल्यूनं चुपिं त्यूगु थें जूगु धयादीगु दु ।
लिच्वः कथं फ्रान्सं अमेरिका व अष्ट्रेलियां थः राजदूततय्त तकं लितसःतूगु दु । उखय्, अष्ट्रेलियाया प्रधानमन्त्री स्कट मोरिसनं धाःसा फ्रान्सया थासय् अमेरिकालिसे पनडुब्बी न्यायेत याःगु निर्णयया बचाऊ यानादीगु दु ।
Categorized in अन्तर्राष्ट्रिय
