२०८० चैत्र १६, शुक्रबार

फ्रान्सयात बुका स्विट्जरल्याण्ड युरोकप फुटबलया क्वाटरफाइनलय्

बछलागा पञ्चमी ११४१, असार १५ मंगलबाः

स्पेन व स्विट्जरल्याण्ड युरोकप फुटबलया क्वाटरफाइनलय् थ्यंगु दु  । वंगु चान्हय् जूगु कासाय् विश्वकप त्याकामि फ्रान्सयात टाइब्रेकरय् बुका स्विट्जरल्याण्ड क्वाटरफाइनलय् थ्यंगु खः ।
 
कासाया क्वजिनातःगु इलय् निगुलिं टोलीपाखें ३गू ३गू गोल जुल । फ्रान्सया करिम बेन्जमां निगू व पउल पोग्बां छगू गोल याःबलय् स्विट्जरल्याण्डया ह्यारिस सेफेरोभिचं निगू व मारियो गाभ्रानोभिचं छगू गोल याःगु खः  । ८१गू मिनेट तक्क ३–१या गोल अन्तरं न्ह्योने दूगु फ्रान्सं लिपांगु इलय् २गू गोल नयेधुंका कासा अतिरिक्त इलय् थ्यंगु खः  ।
 
अतिरिक्त इलय् निगुलिं टोलीं गोल याये मफुत । टाइब्रेकरय् फ्रान्सया किलियन एम्बाप्पेया लिपांगु प्रहारयात विपक्षी गोलकिपरं पनेधुंका स्विट्जरल्याण्ड ५–४ या गोल अन्तरं त्यागु खः  । 
वंगु चान्हय् जुगु मेगु कासाय् क्रोएसियायात अतिरिक्त इलय् ५–३या गोल अन्तरं बुका स्पेन क्वाटरफाईनलय् थ्यंगु दु ।
 
क्वजिनातःगु ईया कासा ३गू–३गू गोलया ज्वलिन्ज्वःलय् थ्यंगु खः । अतिरिक्त इलय् स्पेनया अल्भारो मोराटा व मिकेल ओयरजबालं छगू छगू गोल यासें स्पेनयात त्याकाबिल । 
 
युरोकप फुटबलय् थौं राउण्ड अफ सिक्सटिनया लिपांगु निगू कासा जुइ । आयरल्याण्डया डब्लीनय् बहनि ९ ता ई जुया ४५ गू मिनेटय् इंग्ल्याण्ड  व जर्मनी दथुइ कासा जुइबलय् चान्हय् १२ ता ई जुया ४५ गू मिनेटय् स्कटल्याण्डया ग्लासगोय् जुइगु कासाय् स्विडेनं य्ुक्रेनलिसे म्हितिइ ।  
 
 
Categorized in कासा