२०७९ जेठ ७, शनिबार

फ्रान्सय् खोप मकाःपिनि विरुद्धया प्रतिबन्धविरुद्ध ब्यापक प्रदर्शन

थिंलागा चतुर्दशी ११४२, माघ २ आईतवाः

फ्रान्सय् कोरोनाबिरुद्धया खोप मकाःपिं मनूतय्त तःगु प्रतिबन्धबिरुद्ध ब्यापक प्रदर्शन जूगु दु ।

राजधानी पेरिसलिसेंया शहरय् मुंपिं द्वलंद्वः सर्वसाधारणं राष्ट्रपति इमानुएल म्याक्रोंयात कोरोना भाइरसया नां ब्युसें प्रदर्शन याःगु खः ।

आः जुइगु चुनावय् राष्ट्रपति पदया उम्मेदवार फ्लोरियन फिलिपपोटया नेतृत्वय् याःगु बिरोध प्रदर्शनय् राजनीतिक दलया कार्यकर्ता अले सर्वसाधारणया ब्वति दुगु खः ।

प्रदर्शनकारीतय्सं फ्रान्सय् ल्याय्म्हतय्त खोपया बारे जानकारी तकं मदुगु धासें खोप अनिवार्य याये गलत जूगु नं धाःगु दु । प्रदर्शनया हे झ्वलय् टेनिस स्टार नोभाक जोकोभिजयात अष्ट्रेलिया सरकारं खोप मकाःगु हे हुनिं भिसा मब्यूगुलिइ नं प्रदर्शनकारीं अष्ट्रेलियाली सरकारबिरुद्ध नं नारा थ्वयेकूगु खः ।

फ्रान्सया इतिहासय् एलो टिसर्ट धुंकाःया थ्व हे तःधंगु प्रदर्शन जूगु धाःगु दु । प्रदर्शनयात ध्यानय् तयाः सुरक्षा ब्यबस्था क्वात्तुकूगु दु । फ्रान्सय् कोरोनाबिरुद्धया खोप मकाःपिं तःधंगु ल्याखय् दनि ।

थ्वयां न्ह्यः, फ्रान्सया तःधंगु सदनं खोप अनिवार्य यायेगु बिधेयकयात मान्यता ब्यूगु खः ।

Categorized in अन्तर्राष्ट्रिय