बंगलादेश न्हापांगु खुसी विश्वकप क्रिकेट सुपर लिगया शिर्ष थासय्
कछलाथ्व पुन्ही ११४१,जेष्ठ १२ बुधवाः
बंगलादेश विश्वकप क्रिकेट सुपर लिगया ल्याः धलखय् शिर्ष थासय् थहांवंगु दु ।
श्रीलंकाविरुद्धया स्वंगू एक दिवसिय कासाया सिरिजय् निगू कासा त्याकाः सिरिज पक्का याःगु बंगलादेश धलःया शीर्ष थासय् थ्यंगु खः । सुपर लिगय् न्हापांगु खुसी शिर्ष थासय् थहांवंगु बंगलादेशं श्रीलंकाविरुद्ध निगू कासा त्याकूगु खः ।
सुपर लिगय् बंगलादेशं च्यागू कासाय् न्यागू त्याकूगु खःसा स्वंगुलिइ बुनाः ५० ल्याः मुंकाः शिर्ष थासय् थहांवंगु दु । निगूगु थासय् इंग्ल्याण्ड दुसा पाकिस्तान स्वंगूगु व अष्ट्रेलिया प्यंगूगु थासय् दु ।
स्वंगुलिं क्लवयन ज्वलिंज्वः ४० ल्याः दुसां रन रेटया लिधंसाय् इंग्ल्याण्ड निगूगु व पाकिस्तान स्वंगूगु थासय् लाःगु् खः । सुपर लिगया ल्याः धलखय् भारत च्यागूगु थासय् दु । वं म्हितूगु ६ कासाय् स्वंगू त्याकूगु दुसा स्वंगुलिइ बूगु दु । वया २९ ल्याः दु ।
धलखय् अफगानिस्तान व वेष्ट इन्डिज, न्युजिल्याण्डया ज्वलिंज्वः ३० ल्याः दु । सुपर लिगय् नेदरल्याण्ड्सं आःतक्क छगू कासा नं म्हितेमखंनि । श्रीलंका न्यागू कासा म्हितूबलय् न्यागुलिं हे बूगु दु ।
Categorized in कासा
