बजेटय् सम्बन्धित मन्त्रीं लिसः बिया थौं हे पारित यायेगु तयारी
लहनान्युज | तछलागा तृतीया ११४०,जेठ २६ सोमवाः
प्रतिनिधि सभा बैठकया बजेटय् वःगु न्ह्यसःया लिसः सम्बन्धित मन्त्रीं थौं लिसः बिइगु ज्याझ्वः दु ।
लिसः बिइ धुका थौं हे विनियोजन विधेयक पारित यायेगु कार्यसूची तया तःगु दु ।
विनियोजन विधेयक पारित जुलकि न्हुगु आर्थिक वर्ष सुरु जूगु अथे धइगु साउन १ निसे रकम खर्च यायेत सरकारयात लँ चाइगु दु ।
संसद भवन नयाँ बानेश्वरय् थौं सोमवाः सुथय् ११ बजे च्वनेगु बैठकय् प्रधानमन्त्री कार्यालय सहित २१ गू मन्त्रालयया विनियोजित बजेटबारे सांसदपिन्स न्यःगु न्ह्यसःया सम्बन्धित मन्त्रीं लिसः
बिइ ।
बैठकय् सांसदपिन्स पेश याःगु निगु दर्जन स्वया अप्वगु खर्च कटौतीया प्रस्ताव न निर्णयार्थ पेश यायेगु कार्यसूचीइ दु ।
मन्त्री याःगु लिसः व खर्च कटौतीका प्रस्ताव निर्णयार्थ पेश याये धुका अर्थमन्त्री डाक्टर युवराज खतिवडां विनियोजन विधेयक निर्णयार्थ याइगु ज्याझ्वः दु ।
