बन्दय् झ्वलय् व्यापक प्रहरी हस्तक्षेप
लहनान्यूज | पोहेंलाथ्व षष्ठी ११३७ (जनवरी ४ २०१७)
सडक विस्तारया विरुद्ध थौं उपत्यकाव्यापी संघर्ष समितिं आव्हान याःगु बन्दया झ्वलय् व्यापक रुपं प्रहरीं हस्तक्षेप याःगु दु ।
उचित क्षतिपूर्ति, मुआब्जा लिसें पुनर्वासया माग यासें सतकय् कुहां वःपिन्त प्रहरीं थायथासं ज्वंगु दु । न्हूसतकया जुद्ध शालिकं नं तःम्हेसित हे प्रहरीं हिरासतय् काःगु दु ।
कालिमाटिं बाजंगाजंलिसें शान्तिपूर्ण ढंगं प्रदर्शन यानावःपिन्त न्हूसतक थ्यंकाः ज्वंगु खः । उकिया झ्वलय् उपत्यकाव्यापी संघर्ष समितिया कजि सुमन सायमिलिसें लहना मिडियाया व्यवस्थापक सुरेन्द्रभक्त श्रेष्ठ नं हिरासतय् लाःगु दु ।
संघर्ष समितिया कजि सुमन सायमिं शान्तिपूर्ण बन्दय् राज्यपाखें याःगु दमनयात थःपिन्सं प्रतिकार यायेगु धयादिल । सडक विस्तारया झ्वलय् थःपिन्त जूगु क्षतिया उचित क्षतिपुर्तिलिसें पुनर्वासया माग यानावःपिन्त ज्वनायंकाः दमन याःगु वयकःया धापू खः ।
प्रहरीं कालिमाटिइ मनूतयत छथाय् मुने तक हे मब्यूगु प्रत्यक्षदर्शीं धाःगु दु ।
Categorized in राष्ट्रिय
