बन्द शान्तिपूर्ण ढंगं क्वचाल
लहनान्यूज | पोहेंलाथ्व षष्ठी ११३७ (जनवरी ४ २०१७)
उपत्यकाव्यापी सडक विस्तार पिडित संघर्ष समितिं आव्हान याःगु थौंया बन्द शान्तिपूर्ण ढंगं क्वचाल ।
संघर्ष समितिं थौं सनिलया ५ताः ईतक्क बन्द यायेगु धाःकथं आः ५ताः ई लिपा बन्द क्वचाःगु घोषणा याःगु खः । सनिलय् बसन्तपुलिइ छगू सभा यासें संघर्ष समितिपाखें रामशरण डंगोलं बन्दय् साथ ब्यूपिन्त सुभाय् देछासें बन्द क्वचाःगु घोषणा यानादिल ।
बन्द क्वचाःगु घोषणा जूगुलिसें हे बन्दया झ्वलय् ज्वनायंकूपिन्त नं प्रहरीं त्वःताहःगु दु । थीथी थासं ज्वनायंकाः महेन्द्र पुलिस क्लबय् तयातःपिं ३१म्हेसित बन्द क्वचाःगुलिसें हे त्वःताहःगु खः ।
रिहा जूगुलिसें संघर्ष समितिया कजि सुमन सायमिं आः थुगु आन्दोलनयात अझ सशक्त ढंगं न्ह्यःने यंकेगु धयादिल । समितिया मुँज्या च्वनाः न्हूगु ज्याझ्वः क्वःछिनाः सार्वजनिक यायेगु वयकलं धयादिल ।
Categorized in राष्ट्रिय
