बागमती प्रदेशय् नेपाल कम्युनिष्ट पार्टी एकीकृत समाजवादी संसदीय दलया नेता राजेन्द्र पाण्डे मुख्यमन्त्री जूगु दु ।

प्रदेश प्रमुख यादवचन्द्र शर्मां पाण्डेयात म्हिगः मुख्यमन्त्रीया सपथ याकादिल । न्हूगु सरकारय् माओवादीया कुमारी मोक्तान, कांग्रेसया कृष्णलाल भडेल व नेकपा (एस) या कृष्ण खनालयात मन्त्री दयेकूगु दु ।

माओवादी सामाजिक विकास मन्त्री, कांग्रेस भौतिक पूर्वाधार व नेकपा (एस) या भागय् आन्तरिक मामिला तथा योजना मन्त्रीया भाला लाःगु दु । वाग्मती प्रदेशय् सत्तारुढ नेकपा (एमाले) ब्वदलाः १३ सांसदं न्हूगु गठित नेकपा (एस) ल्यःगुलिसें अल्पमतय् लाःम्ह मुख्यमन्त्री अष्टलक्ष्मी शाक्यं पदं राजीनामा बियादीगु खः । मुख्यमन्त्री जूगु ७१न्हुगु दिनय् शाक्य सत्तां बहिर्गमन जूगु खः ।

थ्व हे दथुइ, न्हूम्ह नियुक्त मुख्यमन्त्री पाण्डें थःगु कार्यकाल भ्रष्टाचाररहित जुइगु दाबी यानादीगु दु । मुख्यमन्त्री पदया शपथ कायेधुंकाः पत्रकारतलिसेया खँल्हाबल्हाय् मुख्यमन्त्री पाण्डें सुशासनया लागिं कुतः यायेगु धासें समाजवाद उन्मुख ज्याझ्वः न्ह्यःने हयाः जनताया सेवा यायेगु प्रतिवद्धता प्वंकादिल ।

सर्वहारा, श्रमजीवी, गरिब किसानया पक्षय् ज्या यायेगु वय्कःया धापू खः । मुख्यमन्त्री पाण्डें न्ह्यःया सरकारं गलत निर्णय याःगु जूसा उकियात भिंकावनेगु धयादिल । प्रदेश सरकारं पूरक बजेट हयेफइगु वय्कःया धापू खः ।

प्रदेश सरकारया नेतृत्व पालंपाः यायेगु बारे न्यंगु छगू न्ह्यसलय् केन्द्रय् जूगु सहमति कथं हे थः मुख्यमन्त्री जुयागु धासें गठबन्धनं याइगु निर्णय कथं थः न्ह्याःवनेगु प्रष्ट यानादिल ।

Categorized in राजनीति