बागमती प्रदेश सरकारं यातायात भाडा २३ गू प्रतिशतं थकाल
कौलाथ्व ११४१, असोज २१ बिहीवाः
स्वनिगःलय् सार्वजनिक यातायातया भाडा थकाःगु दु ।
बागमती प्रदेश सरकारं कात्तिक १ गते निसें लागू जुइगु याना बागमती प्रदेश दुने न्ह्याइगु सार्वजनिक यातायातया भाडा थकाःगु दु ।भाडा २३ गू प्रतिशत तक्क थकाःगु दु ।
स्वनिगःया हकय् बिस्कं हे भाडादर लागू जूगु दु । आः स्वनिगःलय् यात्रा याइपिं यात्रुं २०गू किलोमिटर सिवें अप्वःय दूरीइ यात्रा याइपिं यात्रुं ३५तका भाडा पुलेमालिइ ।
अथेहे, २०गू किलोमिटर तक्कया दूरीइ यात्रा याइपिं यात्रुं ३० तका भाडा पुलेमालिगु जूगु दु । थ्व लिसें , प्रदेश सरकारं थकाःगु न्हूगु भाडादर कथं १५गू किलोमिटरया दूरी दुने यात्रा याइम्ह यात्रुं २८ तका, १० गू किलोमिटर दुने यात्रा याइम्ह यात्रुं २३तका व ५ गू किलोमिटरतक्कया दूरीइ यात्रा याइम्ह यात्रुं १८ तका भाडा पुलेमालिगु जूगु दु ।
समायोजित भाडादर कथं आः स्वनिगःलय् यात्रा याइम्ह यात्रुं दक्वःलय् चिहाकःगु दूरीइ यात्रा याइबलय् म्होतिइ १८ तका भाडा पुलेमालिगु जूगु दु । थ्वयान्ह्यः, सार्वजनिक यातायातं दक्वःलय् चिहाकःगु दूरीया यात्रा याइम्ह यात्रुलिसे न्यूनतम १५ तका कयावःगु खः । तर भाडा धाःसा १३तका कायम जूगु खः ।
Categorized in राष्ट्रिय
