बाय्लपा (चिबाखं)
– राजुराम मुनकःमि
 
जिमि साहित्यिक पत्रिकाया नितिं छन्हु छगू इन्स्योरेन्स कम्पनीइ बिज्ञापन काःवना । अन म्हस्यूम्ह पासा निर्गुण सिं नाप लाना । अलय् जिं धया, “जिगु मेलय् बिज्ञापन मवःगुलिं पेन ड्राइभ ज्वनावया का पासा ।” 
 
गैर नेवाः जुयाः नं परर नेवाः भाय् ल्हाये सःम्ह अलय् जिनापं नेवाः भासं जक हे खँल्हाइम्ह व पासा निर्गुणं धाल, “पासा, पेनड्राइभय् तये मछिं, ब्लक यानातःगु दु । मेलय् हे छ्वयेमाः । अन पि.ए.नापं छक्वः खँल्हानादिसँ रे, झासँ जिं नाप लाका बी ।”
 
अलय् जिपिं निम्हं दुहां वना । पि.ए.नापं खँल्हाना । अथे जूसां पेनड्राइभय् तयेगु कुतः यात । मज्यू धाल । अलय् मेगु मेल ब्यु जिं छ्वया बी धाल । अले जिं सम्पादक पासाया मेल बिया । उकी छ्वया बिल । अलय् व ला मवः धकाः वं सम्पादक पासायात अनं हे दक्व खँ धयाः फोन याना, “ज्वजलपा मोहन ! जिं छंगु मेलय् थनं छ्वया हय्धुन । छक्वः स्वयाः लिसः ब्यु रे न्हिं ।” 
 
जिमिगु फोन खँ न्यनाच्वंम्ह अनया छम्ह मेम्ह गैर नेवाः कर्मचारीं खस भासं धाल, “ज्वजलपा भनेको के हो ?” जिं धया– “नमस्कार भनेको ।”
 
अलय् वं ला स्वागत धायेत छु धाइ ? धन्यबाद धायेत छु धाइ ? गुड मर्निङ्ग, गुडनाइट धायेत छु धाइ ? धाधां बाईबाई धाय्त छु धाइ धकाः न्यन । जिं वया दक्व न्ह्यसःया लिसः ब्युब्युं वयागु लिपांगु न्ह्यसः ‘बाईबाई’यात “बाय्” धाइ धकाः लिसः बिया । 
 
अनया ज्या सिधयेकाः का वने न्हिं ! धकाः व पि.ए. व वहे न्ह्यसः न्यम्हेसिनं धाल, “बाय्लपा” जि ला पलख वया खँ न्यनाः अकमकय् जुल । अलय् जिं बाय् जक खः धयाः जि अनं पिहां वया । उबलय् हे जितः पिने जिल्लायापिं झी पूरा नेवाः जुयाः नं नेवाः भाय् मसःपिं नेवाःतय्सं खालि “निनि, पाजु, अजि” आदि खँग्वः जक ल्हाना जूसां झी मांभाय्यात म्वाकातःगु, मांभाय् ल्हाय् यःसां ल्हाये मसःगु विवशता छक्वः लुमंसे वल ।