बार्सिलोनाया प्रशिक्षकं पद त्वःतीगु
लहनान्यूज | चिल्लाथ्व चतुर्थी ११३७ (मार्च २ २०१७)
स्पेनिस फुटबल क्लव बार्सिलोनाया प्रशिक्षक लुईस एन्रीकं थुगु सिजनलिसें हे पद त्वःतीगु जूगु दु ।
एन्रीकं स्वदँ न्ह्यःनिसें बार्सिलोनाया प्रशिक्षण बिया वयाच्वनागु झ्वलय् थःत छुं ई विश्राम माःगुलिं जिम्मेवारीमुक्त जुइत्यनागु धाःगु दु ।
तर न्ह्यानाच्वंगु सिजनय् बार्सिलोनां बांलाःगु कासा क्यने मफयेधुंकाः प्रशिक्षक एन्रीकयात दबाब अप्वःगु खः । थुगु हे दबाबया हुनिं एन्रीकं सिजन क्वचायाकथं प्रशिक्षकया पद त्वःतेगु घोषणा याःगु धाःगु दु ।
च्याम्पियन्स लिग राउण्ड अफ सिक्सटिन अन्तर्गत न्हापांगु लेगया कासाय् फ्रान्सया पेरिस सेन्ट जर्मेन पिएसजीलिसे ४/० गोल अन्तरं बुइधुंकाः एन्रीकयात दबाब अप्वःगु खः ।
४१दँयाम्ह एन्रीकं न्हापांगु दँय् बार्सिलोनायात युरोपियन च्याम्पियन्स लिगलिसें स्वंगू उपाधि त्याकाब्यूगु खः । अथे हे थगुने स्पेनिस लिगलिसें निगू उपाधि त्याकाब्यूगु खः ।
थुगुसी धाःसा बार्सिलोनां उलि बांलाःगु कासा क्यनेमफुनि । बार्सिलोना च्याम्पियन्स लिगय् नक आउट जुइगु अवस्थाय् थ्यंगु दु ।
Categorized in कासा
