बार्सिलोना विदाइया ईलय् भावुक जुल मेसी
गुँलाथ्व पारु ११४१, साउन २५ गते सोमबाः
स्टार फुटबल कासामि लिओनल मेसी स्पेनिस क्लब बार्सिलोनां विदा जूगु दु ।
बार्सिलोनां ग्वसाःग्वःगु विदाइ ज्याझ्वलय् मेसी भावुक जूगु खः । वयेकलं बार्सिलोनापाखें थुकथं विदा जुइ मालिइ धका गबलें हे विचाः मयानागु धयादीगु खः । बिदाइ ज्याझ्वया शुरुइ मेसीं थःगु खँ तःगु खः ।
वयेकलं थःगु खँ तयेधुंका अन दुथ्यापिन्सं लापा थाना वयेकयात सम्मान प्रकट याःगु खः । सुरूनिसें हे भावुक खनेदूम्ह मेसीं थःपिन्त कःघाये मफयेधुंका ख्वःगु खः ।
थ्वयान्ह्यः शुक्रबाः बार्सिलोनां मेसी आः क्लबय् मच्वनिगु धाःगु खः । आर्थिक व संरचनागत पंगःया हुनि मेसी क्लबय् च्वने मफइगु बार्सिलोनाया धापू खः । १३दँया वैशय् बार्सिलोनाय् आवद्ध जूम्ह अर्जेटिनाया मेसीया लिपांखुसिइ जूगु सम्झौता वंगु जुनय् क्वचागु खः ।
वयेकलं क्लबया नितिं आपालं रेकर्ड दयेकुगु दु । मेसीं बार्सिलोनाया नितिं दक्वःलय् आपा ६ सः व ७२गू गोल याःगु दु । वयेकलं बार्सिलोनाय् दूबलय् ३५गू उपाधि त्याकुगु दु । गुकिइ १०गू ला लिगा व ४गू च्याम्पियन्स लिगया उपाधि दु ।
वय्क ला लिगाया दक्वःलय् आपा ४ सः व ७४गू गोल याम्ह कासामि नं खः ।
Categorized in कासा
