नेपाल बार एशोसियसनं थौंनिसें प्रधानन्यायाधीश चोलेन्द्र शमसेर जबराया राजीनामा माग यासें औपचारिक रुपं आन्दोलन न्ह्याकुगु दु ।

बारं थौं सुथय् १०ताः इलंनिसें ११ताः ईतक्क हाकूगु पट्टी चिनाः सर्वोच्च अदालत परिसरय् धर्ना बिउगु ख । विरोधया थ्व ज्याझ्वः स्वन्हुतक जुइ । प्रधानन्यायाधीश राणां सर्वोच्च अदालतय् विकृति, विसंगति व भ्रष्टाचार पनेमफूगु अले न्यायपालिकाया स्वच्छता व गरिमा ल्यंका तयेमफूगु धासें नेपाल बारं राणायात राजीनामाया लागिं न्यान्हुया अल्टिमेटम ब्यूगु दु ।

कात्तिक १६ गतेतक नं राजीनामा मवःसा विरोधया थप ज्याझ्वः घोषणा यायेगु बारं न्ह्यथंगु दु । उखे, प्रधानन्यायाधीशया राजीनामाया मागय् वंगु सोमबाःनिसें इजलास बहिष्कार यानाच्वंपिं सर्वोच्चया न्यायाधिशतय्सं थौं तँसा रणनीति क्वःछीगु जूगु दु ।

इजलास बहिष्कार यानाः विदाय् च्वनाच्वंपिं न्यायाधिशत थौं सर्वोच्चय् उपस्थित जुयाः सहलह याइगु धाःगु दु ।

Categorized in राष्ट्रिय