बिपी स्मृति दिवस हन
लहनान्युज | दिल्लागा त्रयोदशी ११३७ (जुलाई २१ २०१७)
नेपाःया न्हापांम्ह जननिर्वाचित प्रधानमन्त्री विश्वेश्वरप्रसाद कोइरालाया स्वीन्याक्वःगु स्मृति दिवस शुक्रवाः थीथी ज्याझ्वः याना हंगु दु । विपी स्मृति दिवसया लसताय् कांग्रेस, भ्रातृ संस्थां थीथी ज्याझ्वः तकं ग्वसाःग्वःगु खः ।
दिवसया लसताय् नेपाल प्रेस युनियनं येँय् याःगु ज्याझ्वलय् ब्वति कयादीपिन्सं देय्या ह्यूपाःया नितिं विश्वेश्वरप्रसाद कोइरालां म्हितादिगु भूमिकाया चर्चा यानादिल । कांग्रेसया संस्थापक कोइराला २०१५ सालया आमचुनावय् कांग्रेसं दुई तिहाइ बहुमत हयेधुंकाः न्हापांम्ह जननिर्वाचित प्रधानमन्त्री जुयादिगु खः ।
वय्कलं नेपालय् राष्ट्रियता, प्रजातन्त्र व समाजवाद स्थापनाया नितिं राजनीतिक नेतृत्व यानादिगु खः । तर निदँ तक हे ज्या याये मखँक तत्कालीन जुजु महेन्द्रं जननिर्वाचित संसद अपदस्त यायेवं वय्कलं ताःई निर्वासन व जेलय् जिवन हनेमाःगु खः । वय्कलं नेपाली साहित्यया ख्यलय् नं ज्वःमदुगु योगदान बियादिगु दु ।
नेपाली साहित्यय् मनोवैज्ञानिक यथार्थवादी धाराया प्रवर्द्धक कोइरालाया छगू दर्जनं मल्याक कृतित प्रकाशित जुगु दु । विपी कोइराला २०३९ साउन ६ गते मदुगु खः ।
Categorized in राजनीति
