बिराटया मृत्युलिसें दंगु न्ह्यसः व बिचाः यायेमाःगु बिषयत
गथे जुयाः मन्त बिराट ?
बिराट येँया मरु पिगंननिइ च्वंम्ह छम्ह ल्यायम्ह, मांअबुया याकः काय् । आखः ब्वनेत वंगु १७ला ति न्ह्यः अष्ट्रेलिया वंगु खः । अष्ट्रेलिया थ्यंकाः पर्थया इडिथ कोवान युनिभर्सिटीइ इन्जिनियरिङ बिषय अध्ययन यानाच्वंगु खः बिराटया । अध्ययनया लिपांगु दँय् थ्यनेधुंकूगु खः । न्हियान्हिथं ब्वँब्वं अले अनया हे छगू स्थानीय कम्पनीइ ज्या यायां दिं बिना वनाच्वंगु खः ।
उकिया झ्वलय् वंगु अक्टोबर २० या दिनय् बिराट ज्याय् वनेत पिहांवल । वनाच्वँच्वं बिराट आकाझाकां लँय् हे ग्वःतुल । लँय् ग्वःतूम्ह बिराटयात उघ्रिमय् हे वासः यायेत रोयल पर्थ अस्पताल ब्वाकल । अस्पताल थ्यंकाः डाक्टरं स्वयाःलि बिराट मदयधुंकूगु धाल । बिराटया मृत्यु स्ट्रेस अटाय्कया कारणं जूगु जुयाच्वन ।
बिराट मदयधुंकाः सीम्ह नेपाल हयेत समस्या
परीवारया याकः काय् मदयेधुंकाः परीवारयात कःवःगु बज्रपात ला थःगु थासय् हे दनि । अझ उकीसनं मेगु समस्या धइगु ला थः कायया सीम्ह नेपालय् हयेगु हे जुल । अष्ट्रेलियां बिराटया सीम्ह नेपालय् हयेत भचा भचा धेबां मगाःगु जुल । उखें सीम्ह हयेत झण्डै १२ लख तका धइथें नेपाली धेबा माःगु जुल ।
बिराटया सीम्ह नेपाल छ्वया हयेत अष्ट्रेलियाय् च्वनाच्वंपिं नेपाःमिपिनिगु संस्था नेपाली एशोसिएसन अफ वेस्टर्न अष्ट्रेलिया (नावा) पाखें धेबा मुंकेगु ज्या न्ह्याकल । नावा च्यारिटि अकाउन्टय् धेबा ग्वाहालि यायेत सामाजिक संजाललिसें थीथी माध्यमं आव्हान यानाः नावां धेबा मुंकायंकल ।
बिराटया सीम्ह नेपालय् हयेत नेपालय् नं मरु सेवा समितिया नायः डीन तुलाधर व सामाजिक कार्यकर्ता विकिल स्थापित नं सक्रिय जुल । थुखेंउखें माःकथं समन्वय यायां अन्ततः माःगु आर्थिक पक्षया व्यवस्थापन नं जुल । व धुंकाः तिनि बल्ल नोभम्बर ११या दिनस बिराटया सीम्ह नेपाल थ्यंकेफत । अले नोभम्बर १२ शन्चरबारया दिनय् बिराटया अन्त्येष्टि क्वचाल ।
बिराटया मृत्युं थंगु न्ह्यसः
काय् तापाक्क च्वनाच्वंबलय् हे नं मांअबुया थः कायया पीर जुइगु स्वाभाविक हे खत । सु मांअबु दइ, थः कायया पीर मजुइम्ह ? थौं लिहां वइला, कन्हय् लिहां वइला यायां काययात पियाच्वंम्ह मांअबुं थः याकः काय् मन्त धइगु खबर न्यनेमाःबलय् नुगः गुलि जक ख्वल जुइ धइगु अनुमान याये तक नं थाकु । उकीसनं थः मदयधुंकूम्ह कायया ख्वाः छकः नं मां अबुं तुरन्त स्वयेमखन ।
उगु इलय् मांअबुयात गथे जुल जुइ । ब्वया: वनेला, थः काययात स्वयेत धइथें जुल खइ । तर भावना धयागु मथू जीवनया यथार्थं । जीवनया यथार्थ धइगु ला सीम्ह नेपालय् हयेगु प्रक्रिया हे खः । व उकीया नितिं माःगु आर्थिक पक्ष । उकिया हे हुनिं अक्टोबरया २० तारीखया दिनय् मदयेधुंकूम्ह कायया अन्त्येष्टि तक नं मांअबुं नोभम्बर १२ तारीखया दिनय् तिनि यायेखन ।
थन मांअबु व मदयधुंकूम्ह कायया दथुइ पंगः जुल आर्थिक पक्ष । व नं १, २ मखु ११ लख तका मछि । खतुं छुं दिं न्ह्यः जक विदेशय् मृत्यु जूम्ह नेपाःमिया सीम्ह नेपाल वायूसेवा निगमं नेपाल हयाबीगु धाःगु खः । तर उकिया नितिं वायूसेवा निगमया फ्लाइट उगु थासय् दु कि मदु धइगु नं न्ह्यसः दनि । आः नेवानिया फ्लाइट मदुगु थासय् खःसा अज्याःगु थासं नेपाःमिया सीम्ह नेपाः गथे यानाः हयेगु धकाः नेपाः देयया सरकारयाके नं छुं नं कथंया नीति नियम मदुगु खनेदत बिराटया मृत्युया घटनाय् ।
नेपाःमित ब्वनेत विदेशय् वनी । राज्यं उकिया रेमिट्यान्स नं नइ । देयया आर्थिक कोष बल्लाकेगु ज्या रेमिट्यान्सपाखें नं जुयाच्वंगु दु । गुलि नेपाःमि ज्या यायेत विदेश वनी, गुलिं आखः ब्वनेत वनी । उकी थथे आकाझाकां मदुम्ह विराट याकःचा वा न्हापांम्ह मखु । उकथं लँय् न्यासिवँवं मृत्यु जुइगु वा ज्यां लिहांवनाः कोथाय् बहनी द्यंम्ह मनू सुथय् दना हे मवइगु घटना आपाः हे जुइगु याः । उकथं थः परीवारया सुं सदस्य मन्त धइगु खबर न्यनेमाल कि जुइगु दुःख ला थःगु थासय् हे दु । उगु दुःखयात छुं यन्त्र वा उपकरणं मापन याये नं फइगु मखु ।
उकीसनं थः मनूया सीम्ह पिने देशं थौं वइला कन्हय् वइला धकाः वःन्हु वःन्हु मछि पीमालीबलय् झन जक स्याःगु घालय् चिमल्ता व्हलाच्वने थें जुयाबी ? थः परीवारया सदस्य मदुगुया क्षति ला गुगु नं कथं पुर्ति जुइ फइ हे मखु । तर उम्ह मनूया सीम्हयात इलय् हे, याकनं परीवारयाथाय् तक्क थ्यंकाबी फःसा कम से कम स्याःगु घालय् ती थें ला जुइमखु । छगू स्याःचालय् मेगु स्याःचाः तनाबी थें मजुइला ?
थज्याःगु घटना इलयब्यलय् जुयाच्वंसां विश्वया गुगु नं देशं, गुगु नं कुनं सीम्हयात तुरन्त नेपाल हयेफइगु व्यवस्था जुइमाःगु खः । आःतक्क अथे धाःसा जुइफुगु अवस्था मदुनि ।
