बीजेपी हिटलरया नाजी पार्टीथें जुल : पाकिस्तानी प्रधानमन्त्री खान
लहना न्यूज | ने.सं. ११३९ दिल्लागा षष्ठि (६ अगष्ट, २०१९), मंगलवाः
पाकिस्तानका प्रधानमन्त्री इमरान खानं भारतीय जनता पार्टी (बीजेपी) हिटलरया नाजी पार्टीथें जूगु टिप्पणी यानादिल ।
भारत सरकारं संविधानया अनुच्छेद ३७० खारेज यासें जम्मू कश्मीरयात केन्द्र शासित दय्कूगु कन्हय् खुन्हु प्रधानमन्त्री खानं पाकिस्तानी संसदयात सम्बोधन यानादिसें उकथं टिप्पणी यानादीगु खः । प्रधानमन्त्री खानं बीजेपी सरकार थःगु देशया संविधान, सर्वोच्च व जम्मू कश्मीर उच्च अदालतया फैसला व संयुक्त राष्ट्रसंघया प्रावधान विरुद्ध वंगु तकं धयादिल ।
‘आः पुलवाथें जाःगु आक्रमण जुइफइगु धयादिसें प्रधानमन्त्री खानं धयादिल, ‘थुकिया नितिं नं पाकिस्तानयात दोष बी, जब कि थ्व कश्मीरया जनतायात क्वत्यःगुया लिच्वः खः । आः ग्याचिकु दु कि तःधंगु ल्याखय् मुसलमानतय्गु नरसंहार जुइफु ।’
खानं जम्मू कश्मीर प्रकरणय् विश्व समुदायं हस्तक्षेप मयाःसा लिबाइगु तकं धायादिल ।
Categorized in अन्तर्राष्ट्रिय
