बुंगःद्यःया रथारोहण हाकनं स्थगित
करुणराज | गुंलाथ्व द्वितीया ११४० (साउन ६ गते) बुधबार
यलया बुंगद्यःया जात्राया झ्वलय् १० गते जुइगु धयातःगु रथारोहण हाकनं स्थगित जूगु दु ।
म्हिगः तिनि १० गतेया नितिं साइत ब्यूगु गुठी संस्थान यलं थौं हाकनं सुचं जारी यासें स्थगित जूगु न्ह्यथंगु खः ।
गुठी संस्थानं जारी याःगु सुचनय् १० गते जुइगु धयातःगु रथारोहण कोभिड १९ संक्रमणया हुनिं आःयात स्थगित जूगु धयातःगु दु । ज्योतिषपाखें हाकनं साइत वयेधुंकाः रथारोहण यायेगु पत्रय् धयातःगु दु ।
म्हिगः जक हे गुठी संस्थान यलं वइगु श्रावण १० गते रथारोहणया नितिं न्हिनसिया १२ः०५ताः निसें १२ः२५ तक्कया साइत ज्योतिषपाखें वःगु धासें पौ सार्वजनिक याःगु खः ।
नेपाल सरकारं म्हिगः बाचानिसें लकडाउन पूवंक चाःगु धाःसा जात्रा, सभा, समारोह थुज्वःगु यक्व मनूत मुनीगु कथंया ज्याझ्वलय् प्रतिवन्ध कायम हे दुगु धाःगु खः ।
नेपाल सरकारया थज्याःगु निर्देशनया दथुइ हे म्हिगः गुठी संस्थान यलं रथारोहणया लागिं धासें रथारोहणयात माःगु ज्या यायेत धासें सरोकारवालायात पौ जारी याःगु खः ।
थ्व स्वयां न्ह्यः नं असार २४ गतेया लागिं रथारोहणया साइत ब्यूगु खःसा छन्हु न्ह्यः वयाः स्थगित याःगु खः ।
तारन्ताः न्हूगु साइत बीगु व स्थगित यायेगु ज्यां आम सर्वसाधारण दथुइ धाःसा अन्यौल व शंकाया लकस जुयावंगु दु ।
Categorized in राष्ट्रिय
