बुंगद्यःया जात्राय् थौं नैंक्यालं लुल
लहनान्यूज | बछलाथ्व त्रयोदशी ११३७ (मे ८ २०१७)
बुंगद्यःया जात्राया झ्वलय् थौं नैंक्यालं लुइगु जात्रा क्वचाःगु दु ।
बुंगद्यःया रथ थतित्वालय् हयेधुंकाः थौं नैंक्यालं लुइगु जात्रा याःगु खः । जात्राया झ्वलय् बुंगद्यःया रथया गजुलिं नं मरिचरि व्हलेगु लिसें नैंक्या कुर्केगु याइ ।
बुंगद्यःया रथया च्वकाः कुर्काहःगु नैंक्याः लानाकायेफुसा सन्तान मदुपिनि सन्तान दइगु जनविश्वास दु । अथेजुयाः उगु नैंक्याः लानाकायेत म्वःम्वः हे मुनेगु याइ ।
थौं नैंक्यालं लुइगु जात्रा क्वचाःगुलिसें कन्हय् याकः मिसा भुज्याः याइ । याकः मिसा भुज्याःलय् कन्हय् सुथ न्हापां मिसातयसं जक रथयात सालाः थतित्वालं इति थ्यंकाः याः न्यायेकी ।
नेपाःया हे दक्कले ताःहाकःगु जात्रा कथं काइगु बुंगद्यःया रथजात्राय् रथ इतिइ थ्यनेधुंकाः जाउलाख्यलय् सालेगु नितिं साइत पिकाइ । जाउलाख्यलय् जाउला जात्रा लिसें जात्रा नं क्वचाइ ।
Categorized in राष्ट्रिय
