बुटवलय् प्यम्हेसित डिस्चार्ज यात
लहनान्युज | तछलाथ्व नवमी ११४०,जेठ १८ आइतवाः
बुटवल धागो कारखानाय् दयेका तःगु कोरोना विशेष अस्पतालय् थौं प्यम्ह कोरोना संक्रमित वासः याका डिस्चार्ज जुगु दु ।
डिस्चार्ज जुपि कपिलवस्तुइ स्वम्ह व रुपन्देहीया छम्ह डिस्चार्ज जुगु दु । उपि वैशाख २९ व ३० गते अस्पतालया आइसोलेसन वार्डय् भर्ना जुपि खः ।
वासः याना छेँय् लिहा पिन्त डाक्टर नाप स्वास्थ्यकःमिपिन्स स्वां बिया विदाइ याःगु खः । वःगु २४ घण्टाया दुने इमिगु निकः तक कोरोना परीक्षणय् नेगेटिभ रिपोर्ट वःगुलि डिस्चार्ज याःगु खः ।
थ्व स्वया न्ह्यः थुगु अस्पतालं रुपन्देहीइ न्हापा कोरोना संक्रमित कोटहीमाई गाउँपालिकाया २५ दँया छम्ह मनूयात वैशाख ३० गते व कपिलवस्तुया १० म्हेसित जेठ १० गते छेँय् छ्वःगु खः ।
आतक थुथु अस्पताल तया तःपि १५म्हेसित छेँय् छ्वये धुकुगु दु ।
प्रदेश पाँचय् ५२म्ह वासः याका छेँय् लिहा वने धुकुगु दु । थ्व स्वया न्ह्य बाँकेय् २१ म्ह व कपिलवस्तुया छम्ह नर्स न वासः याका छेँय् लिहा वने धुकुगु दु ।
