बुद्धकालीन बाखया लिधसाय् ‘कर्म’ दयेकीगु
लहनान्युज | सिल्लाथ्व अष्टमी ११३९ (फ्रेअवरी १३ २०१९)
बुद्धकालीन संकिपा ‘पटाचारा’या च्वमि व निर्देशक रामकृष्ण खड्गीं हाकनं मेगु बुद्धकालीन बाखनय् मेगु संकिपा ‘कर्म’ दयेकीगु जूगुं दु ।
थौं छगु ज्याझ्वःया दथुइ कृषा गौतमीया ६८ क्वःगु लसताय् थथे घोषण याःगु खः ।
उगु ज्याझ्वलय् जनकवि दुर्गालाल श्रेष्ठ व ख्यालिजुजु मदनकृष्ण श्रेष्ठया मूपाहाँसुइ उगु संकिपाया भिंसाइत ज्याझ्वः जुगु खः ।
गुण सिनेमाया कजि दिजेन्द्र शाक्यं साइतया नैंक्याय् तछ्यानादीगु उगु ज्याझ्वलय् कलाकार कर्मा शाक्य व आशिष्मा नकःमिपिन्सं साइतया लूया नितिं अभिनय यानादीगु खः ।
थौं ‘कृषागौतमी’या ६८ क्वःगुया लसताय् कलाकार, प्राविधिक व ग्वाहालिमिपिन्त लुमन्ति चिं नं लःल्हायेगु ज्याझ्वः जुगु खः ।
गुण सिनेमाया कजि दिजेन्द्र शाक्यया सभाधक्ष्यताय् जुगु उगु ज्याझ्वलय् निग्रोध भन्तेया पंचशील प्रार्थनापाखें न्ह्याःगु खःसा विशेष पाँहा कथं बरिष्ठ सिने पत्रकार विजयरत्न असंबरे संकिपा ‘कर्म’या च्वमि व निर्देशक रामकृष्ण खड्गी, जनकवि दुर्गालाल श्रेष्ठ व ख्यालिजुजु मदनकृष्ण श्रेष्ठपिन्सं थःथःगु नुगःखँ तयादीगु खः ।
