बुद्ध भजन प्रतिभा मालेज्याय् अगिना व सुशील न्हाप
बुद्ध शान्त पार्क निर्माण समितिया ग्वसालय् नेपालभाषा व नेपाली बुद्ध भजनया माध्यमं अनलाइनपाखें जुयाच्वंगु प्रतिभा मालेज्याया त्याकामिपिं घोषित जूगु दु । नेपाली बुद्ध भजन विधा शनिबाः येँय् क्वचाःगु लिपांगु धेंधें बल्लाखय् अगिना तण्डुकार न्हाप लात सा रेशम थापा ल्यू व कल्पना श्रेष्ठ लियांल्यू लात । त्याकामिपिन्त शहरी विकास राज्यमन्त्री रामवीर मानन्धरं ट्रफि लःल्हानादिल । अथे हे, प्रा. सुवर्ण शाक्यं दसिपौ लःल्हानादिल ।
 
नेपाली बुद्ध भजन अन्तर्गतया प्रतिभा मालेज्याय् मुक्कं सच्छिम्हेसिनं ब्वति काःगु खःसा अनलाइन माध्यमं जूगु धेंधें बल्लाःया थीथी चरणं त्यानावयाः लिपांम्ह १० तक्क थ्यनेत ताःलाःपिं टप टेन दथुइ लिपांगु धेंधें बल्लाः जूगु खः । उगु हे ज्याझ्वलय् कासा ज्वःछि दक्कले आपाः एसएमएस चूलाकूपिं निम्ह व युट्युबय् दक्कले आपाः भ्यूज वःपिं निम्हलिसें कासाया दक्कले ज्याथःम्ह छम्ह व जिथिम्ह छम्ह लिसें दक्कले क्वकालिम्ह मचा कासामियात तकं सिरपाः ब्यूगु खः ।
 
ज्याझ्वलय् वरिष्ठ गायिका रमना श्रेष्ठ, प्रा. सुवर्ण शाक्य लिसें नं वौद्ध ख्यलय् धेंधें बल्लाः वा कासा मजुइगु तर ईकथं न्ह्याःवनाः प्रतिभा मालेगु ज्या धाःसा बांलाःगु बिचाः तयादिल ।
 
शुक्रबाः क्वचाःगु नेपालभाषा बुद्ध भजनया प्रतिभा मालेज्याय् धाःसा सुशील शाही न्हाप लात सा मन्जिल शाक्य ल्यू व प्रतिमा बज्राचार्य लियांल्यू लायेत ताःलात । वय्कः त्याकामिपिन्त नं शहरी विकास राज्यमन्त्री मानन्धरं हे ट्रफि लःल्हानादीगु खःसा उद्योगपति, समाजसेवी धर्मबहादुर शाक्यं दसिपौ लःल्हानादिल । न्हाप लाःम्ह शाहीयात समाजसेवी शाक्यं व्यक्तिगत थःगुपाखें ५द्वः तका नं बियादीगु खः । नेपालभाषा बुद्ध भजन विधा अन्तर्गत नं दक्कले आपाः एसएमएस मत चूलाकूपिं निम्ह व युट्युबय् दक्कले आपाः भ्यूज वःपिं निम्हेसित सिरपाः ब्यूगु खः ।
 
नेपालभाषा विधापाखें धाःसा मुक्कं सच्छि व ४०म्हेसिया ब्वति दुगु खः । निन्हुया हे धेंधें बल्लाखय् वरिष्ठ संगीतकारद्वय डबल शाक्य व अनिल तुलाधर, वरिष्ठ गायिका रमना श्रेष्ठ, लोककवि राजभाई जकःमि व वरिष्ठ लेखक, निर्देशक पवन जोशी दुथ्याःगु निर्णायक मण्डलं त्याकामि ल्यःगु खः ।
 
नुगः खँ तयेगु झ्वलय् शहरी विकास राज्यमन्त्री रामवीर मानन्धरं कासाया ग्वसाः खलः बुद्ध शान्त पार्क निर्माण समितिं देवघाटय् दयेकाच्वंगु पार्कया लागिं थम्हं फक्व ग्वाहालि यायेगु प्रतिवद्धता प्वंकादिल । बुद्धया शान्तिया हसना व महान वाणीयात अन्तर्राष्ट्रिय जगतय् प्रचार यायेगु ज्याय् ग्वाहालिया लागिं संघ, प्रदेश व स्थानीय सरकारलिसे थम्हं समन्वय यायेगु राज्यमन्त्री मानन्धरं धयादिल ।
 
बुद्ध शान्त पार्क निर्माण समितिं देवघाटय् ३० रोपनी जग्गाय् १६ फिट तःधिकःम्ह बुद्ध मूर्तिया नापं पञ्चबुद्ध तकं स्थापना यानाः ध्यान कक्षलिसेंया बुद्ध शान्त पार्क दयेकेज्यायात न्ह्याकातःगु दु ।
Categorized in मनोरन्जन