बुन्डेसलिगाय् बोरुसिया डर्टमण्ड त्यात
गुंलागा षष्ठी ११४१, भाद्र १२ सनिवाः
जर्मन बुन्डेसलिगाय् बोरुसिया डर्टमण्ड त्याःगु दु । लिपांगु ईलय् इर्लिङ हालान्डं गोल यानाबीवं डर्टमण्डयात सफलता चूलाःगु खः ।
वंगु चान्हय् जूगु कासाय् डर्टमण्डं होफेनहमयात ३–२ गोल अन्तरं बुकूगु दु । न्हापांगु हाफ गोलरहीत ज्वलिंज्वः जूगु खः । कासाय् निगुलिं पक्षंयानाः ५गोल नकूगु दु ।
४९गूगु मिनेटय् रियो जेनां गोल यायेवं डर्टमण्डं शुरुआती अग्रता दयेकूगु खः । ६१गूगु मिनेटय् क्रिस्टोफ बाउमगार्टनरं गोल यानाबीवं होफेनहमं न कासायात ज्वलिंज्वः यानाब्यूगु खः । ६९गूगु मिनेटय् जर्ज बेलिङघमं गोल यायेवं डर्टमण्ड २–१ गोलं न्ह्यःनय् थ्यंगु खः ।
९०गूगु मिनेटय् मुनास डाबुरं गोल यायेवं होफेनहमं कासायात २गू–२गू गोलया ज्वलिंज्वः यानाः क्वचायेकेगु लक्ष्य तःगु खः । तर, इन्ज्योरी ईलय् हालान्डं हाकन गोल नकेवं डर्टमन्ड ३–२ गोल अन्तरं त्याःगु खः ।
थ्व लिच्वःनाप डर्टमण्ड, ३गू कासापाखें ६गू ल्या दयेकाः धलःया दकले न्ह्यःनय् लाःगु दु । होफेनहम प्यंगूगु थासय् दु ।
