बुबहालय् मोहनि मेला न्ह्यात
लहनान्युज | कौलाथ्व तृतिया ११३९ (अक्टुवर १ २०१९)
राज्यया स्वंगुलिं तगिंया जनप्रतिनिधितसें यलया ऐतिहासिक बौद्ध विहार (बहाः बही)यात पर्यटकीय आकर्षक गन्तब्यकथं विकास याय्माःगु खँय् बः ब्यूगु दु ।
बुबहाल युवा समूहं यल महानगरपालिका–१६या विशेष ग्वाहालिइ यशोधरवर्ण महाविहार, बुबहालय् ग्वसाः ग्वःगु मोहनि मेला–२०७६ उलेज्या यानादिसें संघ, प्रदेश व स्थानीय तगिंया जनप्रतिनिधिपिन्सं उगु खँय् बः ब्यूगु खः ।
मेलाया उलेज्या यानादिसें यल क्षेत्र नं. २या संघीय सांसद कृष्णलाल महर्जनं बौद्ध विहारया संरक्षण यानाः पर्यटकपिनिगु नितिं आकर्षक गन्तब्यकथं विकास याय्माःगुलिइ बः बियादिल ।
लुम्बिनीइ वनेत नेपाः वइपिं हलिंया बौद्ध धर्मालम्बीतय्त थनया ऐतिहासिक बौद्ध विहारयात कयाः प्रचारप्रसार यानाः उमित यलय् दुत हय्फइगु आपालं क्वात्तुगु सम्भावना दुगु नं सांसद महर्जनं धयादिल ।
उगु ज्याझ्वलय् प्रदेश नं. ३या सांसद शोभा शाक्यं जिल्लाया लिच्छवीकालीन व मल्लकालीन बौद्ध विहार, बुद्ध दर्शन, संस्कृति व संस्कारया मू केन्द्र जूगु न्ह्यथसें थुकियात पर्यटकीय ‘रुट’य् दुथ्याकेत फुक्क जाय्माःगु धयादिल ।
न्ह्यःने वयाच्वंगु ‘भिजिट नेपाल – २०२०’य् नेपाः दुहां वइपिं पर्यटकपिन्त उपलब्धीमूलक दय्केत बौद्ध विहार चाःहिकेगु, अनया जीवन्त संस्कृतियात कयाः जानकारी बीकथं विशेष प्याकेज हय्फइगु नं वय्कःया धापू खः ।
सांसद शाक्यं धयादिल, “बौद्ध विहार धार्मिक दृष्टिं जक मखुसे प्रस्तर कला, काष्टकलाया ल्याखं नं तसकं महत्वपूर्ण जू । विहार जःखः होमस्टेया व्यवस्था याय्फपत धाःसा आयआर्जन याय्फइगु सम्भावना दु ।” वय्कलं बौद्ध विहारयात पर्यटकीय गन्तब्यकथं विकसित याय्गु नितिं उकिया संरक्षण, सम्बद्र्धन व माःकथंया पूर्वाधार दय्केमाःगु खँय् बः बियादिल ।
थ्व हे झ्वलय् प्रदेश नं. ३या सांसद ज्ञानेन्द्र शाक्यं यलयात साँस्कृतिक व पर्यटकीय नगरी घोषणा याय्माःगु बिचाः प्वंकादिल । थुकिया नितिं राज्यया स्वंगुलिं तगिं जानाः न्ह्याःवनेमाःगु खँय् सांसद शाक्यं बः बियादिल ।
समारोहस यल महानगरपालिका –१६या नायः निर्मलरत्न शाक्यं वडादुनेया संस्कृति, सम्पदा, बौद्ध विहार यक्व दुगुलिं उकियात ध्यानय् तयाः वडां संस्कृति, सम्पदाया संरक्षणयात न्हापांगु प्राथमिकताय् तयागु जानकारी बियादिल ।
कला, संस्कृति, सम्पदा संरक्षण यानाः पर्यटकीय गन्तब्य दय्केत, स्थानीयया आर्थिक व मानवीय विकासया नितिं गबलें वडां हे मेला याय्गु व गबलें मेला याइपिन्त ग्वाहालि याय्गु नीति नालागु नं नायः शाक्यं धयादीगु दु ।
न्यान्हु तक मेला
स्थानीय मिसापिनिगु उद्यमशीलता विकास याय्गु तातुनां मेला ग्वसाः ग्वयागु समूहया नायः बाबुराजा बज्राचार्यं धयादिल । न्यान्हुतक न्ह्याइगु उगु मेलाया सहआयोजककथं यशोधर बचत तथा ऋण सहकारी संस्था लि. व संरक्षकय् यशोधर महाविहार सुधार समिति दुगु खः ।
मेलाय् स्थानीय मिसा समूह, सहकारपाखें उत्पादन याःगु न्हियांन्हिथं छ्यलाबुला याइगु हलंज्वलं, कापः, छाय्पीगु हलंज्वलंया स्टल दु । मेलाया आकर्षकथं न्हियांन्हिथं सनिलय् चर्याप्याखं, साँस्कृतिक ज्याझ्वःया नापनापं नेवाः नसाज्वलंत दु । मेलापाखें नेवाः नसाज्वलंया ब्राण्डिङ, स्थानीय कलाकारपिनिगु प्रबद्र्धन जुइगु ग्वसाः खलःया विश्वास दु ।
