बुर्किना फासोयात बुकुसें सेनेगल फाइनल थ्यन
सिल्लाथ्व द्वितिया ११४२, माघ २० बिहीबाः
बुर्किना फासोयात बुका सेनेगल अफ्रिका कप अफ नेशन्स फुटबल धेंधेंबल्लाया फाइनलय् थ्यंगु दु ।
क्यामरुनय् वंगु चान्हय् जूगु ुेसेमिफाइनल कासाय् सेनेगलं बुर्किना फासोयात ३गू–१गूया गोल अन्तरं बुकुगु दु । सेनेगल त्यागुलिइ सादियो माने, अब्दु दियालो व इद्रिसा गुएं छगू छगू गोल याःगु खः ।
बूगु टोली बुर्किना फासोया ब्लाती टुरें छगू गोल याःगु खः । थुगु कासाय् गोल यायेधुंका मानें सेनेगलया नितिं दक्वःलय् अप्वः गोल याःम्ह हेन्री कामाराया २९गू गोलया किर्तीमान ज्वलिन्ज्वः याःगु दु ।
फाइनलय् गोल याःसा मानें राष्ट्रिय टोलीया नितिं दक्वःलय् अप्वः गोल याःगु न्हूगु किर्तीमान तयेफइ् । अफ्रिका कप फुटबलया निगूगु सेमिफाइनल कासाय् थौं चान्हय् क्यामरुन व इजिप्ट दथुइ कासा जुइ ।