बेलायतय् खोप काःपिंन्त हे डेल्टा भाइसर संक्रमण
लहानान्युज | दिल्लागा चतुर्दशी ११४१,साउन २३ सनिवाः
बेलायतय् कोरोनाया निगुलिं मात्रा खोप काःपिं मनूतय्के डेल्टा भाइरसया संक्रमण अप्वः जूगु खनेदुगु दु ।
डेल्टा भाइरसया संक्रमणया हुनिं अस्पताल भर्ना जूपिनिगु ल्याः अप्वया वनाच्वंगु धाःगु दु । बेलायतस्थित स्वास्थ्य विभागं कोरोनाया खोप काःपिंके नं डेल्टा भाइरसया संक्रमण तच्वकं न्यनावंगवु धासें चिन्ता नं प्वंकूगु दु ।
वंगु जुलाई १० निसें अगस्ट २ तक्कया तथ्यांक कथं डेल्टा भेरियन्टया हुनिं अस्पताल भर्ना जूपिं बिरामीमध्ये ५५ प्रतिशत कोरोनाया खोप काःपिं मनूत दुगु धाःगु दु ।
स्वास्थ्य सुरक्षा एजेन्सीया कार्यकारी प्रमुख जेनी ह्याजिजं खोपया मात्रा पूवंपिं हे अप्वः अस्पताल भर्ना जूगुलिं चिन्ता अप्वयेकूगु धयादिल । वय्कलं कोरोनाया खोपं दक्वं जोखिम म्ह्वः मजुइगु जूगुलिं स्वास्थ्य सुरक्षाया मापदण्ड पालना धाःसा अनिवार्य दुगु धयादीगु दु ।
बेलायतय् जुलाई १ निसें प्रतिबन्धत फुकुवा याःगु खः । बेलायतया दक्वं नागरिकयात पूर्ण मात्राय् खोप उपलब्ध याकेगु सरकारं थ्वयां न्ह्यः हे घोषणा यायेधुंकूगु दु ।
५७ प्रतिशत स्वयां अप्वः वयस्कतय्सं खोपया निगुलिं मात्रा पूवंकेधुंकूगु बुखँय् धयातःगु दु ।
Categorized in अन्तर्राष्ट्रिय
