बेलायतं नेपालयात कोरोना संक्रमणया रेडलिस्टं चीकल
कौलाथ्व द्धितीया ११४१, असोज २२ शुक्रवाः
बेलायतं नेपालयात कोरोना संक्रमणया रेडलिस्टं चीकूगु दु ।
अन्तर्राष्ट्रिय भ्रमणसम्बन्धी एडभाइजरी ह्यूपाःया झ्वलय् बेलायतं म्हिगः नेपाललिसें ४७ देय्यात रेडलिस्टं चीकूगु खः । अझं ७ देय् धाःसा रेडलिस्टय् दनि ।
बेलायतया न्हूगु ट्राभल एडभाइजरी कथं थ्व हे असोज २५ गते धुंकाः बेलायती नागरिकतय्सं नेपाल भ्रमण यायेखनी । अथे हे, बेलायतं मान्यता ब्यूगु प्यंगू थकंया खोप काःपिं विदेशी नागरिकतय्त नं बेलायत दुहांवयेके बी ।
अज्याःगु देशय् हलिंया ३७ देय् दुथ्याः । उमिसं बेलायतं मान्यता ब्यूगु प्यंगू कथंया खोप थःगु हे देशय् काःगु खःसां बेलायत वनेबलय् क्वारेन्टिन च्वनेम्वाः । तर डे टु प्याकेज अन्तर्गत परीक्षण धाःसा याकेमाः ।
बेलायतं अक्सफोर्ड÷एस्ट्राजेनिका, फाइजर, मोडेर्ना व जोन्सेनया खोपयात मान्यता ब्यूगु दु । बेलायत दुहांवये न्ह्याःपिं विदेशीं खोप काःगु दसिमध्ये एनएचएस कोभिड पास, इयु डिजिटल कोभिड दसिपौ, रोग नियन्त्रण तथा रोकथाम शाखाया पूर्जी वा सम्बन्धित देय्या स्वास्थ्य मन्त्रालयं प्रमाणित याःगु खोपया दसिपौमध्ये छुं छगू न्ह्यब्वयेमाः ।
Categorized in राष्ट्रिय
