२०८१ जेठ १२, शनिबार

बेलायतया प्रधानमन्त्रीया नितिं १०म्ह उम्मेदवार

लहनान्युज | ने.सं. ११३९ तछलाथ्व नवमि (११ जुन, २०१९), मंगलवाः

बेलायतया न्हूम्ह प्रधानमन्त्रीया नितिं अन्तिम १०म्ह उम्मेदवारपिनिगु नां सार्वजनिक याःगु दु । प्रधानमन्त्रीया टेरिजा मे नं वंगु वालय् पार्टी नेतृत्वपाखें राजीनामा बीधुंकाः बेलायतया न्हूम्ह प्रधानमन्त्रीया नितिं दावेदारपिनिगु नां सार्वजनिक याःगु खः ।
 
 
कन्जरभेटिभ पार्टीया नायः हे प्रधानमन्त्री जुइगु जुइवं सरकार व पार्टी नेतृत्वया नितिं नेतातय् दथुइ धेंधेंबल्ला जूगु खः ।
 
 
विदेशमन्त्री जेरेमी हन्ट, पुलांम्ह ब्रेक्जिट मन्त्री डोमिनक राव, स्वास्थ्यमन्त्री माट ह्यानकक व वातावरण मन्त्री माईकल गोभ नं प्रधानमन्त्री पदया नितिं याःगु सार्वजनिक उम्मेदवारया धलखय् दुथ्यानाच्वंगु दु ।
 
 
अथे हे पूर्व सांसद मार्क हार्पर, गृहमन्त्री साजिद जाभिद, पूर्व विदेशमन्त्री बोरिस जोन्सन, संसदया पूर्व नायः आन्ड्रिय लिडसम, पूर्व कार्य तथा अवकाश मन्त्री इस्थर म्याकभे व अन्तर्राष्ट्रिय विकास मन्त्री रोरी स्टेवार्टया नां नं दुथ्यानाच्वंगु दु ।
 
 
ब्रेक्जिट मस्यौदायात कयाः संसद नापं पार्टी दुने तसकं आलोचना जुइधुंकाः प्रधानमन्त्री मे नं राजीनामा घोषणा यानादीगु खः ।
Categorized in अन्तर्राष्ट्रिय