बेलायतय् कोरोनाया न्हूगु भेरियन्ट ओमिक्रोनया संक्रमण अप्वःगु लिसें आपतकाल घोषणा जूगु दु ।

प्रधानमन्त्री बोरिस जोनसनं आमिक्रोन आपतकाल घोषणा यासें नियन्त्रणया नितिं १८ दँ वैंश सिवें च्वयेया फुक्क नागरिकयात थुगु हे वालंनिसें बुस्टर डोज खोप बिइगु धयादील ।

बेलायती टेलिभिजन मार्फत् सम्बोधन यासें प्रधानमन्त्री जोनसनं ओमिक्रोनया आँधी हे वयेफइगुलिइ छुं नं आशंका मदूगु धका इलय् हे सतर्कता नालेत इनाप यानादीगु खः ।

थ्वयान्ह्यः बेलायतं जनवरीया अन्त्यनिसें जक बुस्टर खोप बिइगु योजना दयेकुगु खः । अयेसां आोमिक्रोनया संक्रमण अप्वयेधुंका बुस्टर खोप अभियान लच्छि न्ह्यः हयागु प्रधानमन्त्री जोनसनं जानकारी बियादील ।

कोरोना विरुद्धया खोप निगू डोज जक माक्वः मजूबलय् बुस्टर डोज अनिवार्य जूगुलिं थुकिं भाइरस नियन्त्रणय् ७५गू प्रतिशत तक्क ज्या याइगु अधिकारीतये दाबी दु । गुकिया हुनिं अस्पतालय् जुइगु चाप तकं नियन्त्रण यायेफइ ।

थ्वहे दथुइ बेलायतं बुस्टर खोप अभियानयात केन्द्रित यायेत मेगु स्वास्थ्य सम्बन्धी ज्याझ्वयात लिछ्यागु दु । बेलायतय् ओमिक्रोन संक्रमण तच्वगु रुपय् अप्वयावयेधुंका सरकारं थी थी क्षेत्रय् थप प्रतिबन्धात्मक नियम लागू याःगु दु ।

वंगु छुं वालंनिसें न्हियान्हिथं ५०द्वःम्हसिया हाराहारीइ न्हूपिं संक्रमित थप जूगु दु ।

Categorized in अन्तर्राष्ट्रिय