बेलायतय् न लकडाउन
लहनान्युज | सिल्लागा औसी ११४०
बेलायतया प्रधानमन्त्री बोरिस जोनसनं आवतजावत व जमघट यायेत कडाइ यासे लकडाउनया घोषणा याउगु दु ।
कोरोना भाइरस (कोभिड–१९) पाखे वःगु २४ घन्टा लिपा जक ५५ म्ह सिइगु दु । बेलायत जक कोरोनाया कारण ३३५ म्ह सिइ धुकुगु दु ।
डाइनिङ स्ट्रिटपाखे टेलिभिजन सम्बोधन यानादिसे प्रधानमन्त्री जोनसनं दक्को नागरिक तयेत छेँय् च्वने इनाप याउगु दु । प्रधानमन्त्री जोनसनंया अनुसार आः प्यःगु ज्या यायेत जक छेँय् न पिहा वनेगु अनुमति दु ।
न्हिया न्हिथः उपभोग्य बस्तु, वासः थे जाःगु अत्यावश्यक बस्तु न्यायेत ।
उपचार वा हेरचारया लागि, १८ दँ स्वया कमयापि मस्तय्त थः अभिभावक थाय् वनेत ।
ज्या वनेत व लिहा वयेत, तर थुजःगुु ज्या छेँय् च्वना याये मफइगु जुइमा ।
व्यायामया लागि ब्बाय् वने फइ,न्यासि वने फइ वा साइकल चले याये फइ । तर थ्व छम्ह वा नाप च्वपि नाप जक जुइमा ।
प्रधानमन्त्री जोनसनं अत्यावश्यक बस्तु बाहेकया दक्को पसः बन्द याये धाःगु दु व सार्वजनिक थासय् निम्ह स्वया अप्वो छथाय् च्वने दइ मखु । लाइब्रेरी, खेल मैदान, आउटडोर जिम व
दक्को धार्मिक थाय् न बन्द याःगु दु । पार्कय् व्यायामया लागि वने दइ, तर मनूत जम्मा जुइ दइ मखु ।
सरकारं मनू तयेत जमघट जुइगु सामाजिक ज्याझ्वः न रोक लगे याउगु दु । ब्याहा न रोक याउगु दु । स्वःगु वाःया लिपा थुगु प्रतिबन्धया समीक्षा याइगु व अवस्था स्वया मेगु निर्णय याइगु प्रधानमन्त्री जोनसनं धाःगु दु ।
प्रतिबन्ध उल्लंघन यात धाःसा जरिवाना याइगु तक प्रधानमन्त्री जोनसनं धाःगु दु ।