बेलायतय् युरोप व अमेरिकां वइपिं यात्रुपिन्त अःपुल
दिल्लागा षष्ठी ११४१,साउन १४ बिहीवाः
बेलायतं युरोप व अमेरिकां वइपिं यात्रुया लागिं तःगु प्रतिबन्ध चीकूगु दु ।
कोरोना संक्रमण नियन्त्रणया लागिं उगु राष्ट्रं वइपिं यात्रुतय्त तःगु प्रतिबन्ध चीकूगु बीबसीं जानकारी ब्यूगु दु । कोरोनाविरुद्ध निगुलिं डोज खोप कायेधुंकूपिं युरोप व अमेरिकां बेलायत वइपिं यात्रुतय्सं आः क्वारेन्टाइन च्वनेम्वाःलीगु जूगु खः ।
थ्व नियम वइगु सोमबाः अर्थात अगष्ट २ निसें लागू जुइ । युरोपियन देशं वइपिन्सं निगुलिं डोज खोप काःगु दसि कथं ‘इयू डिजिटल कोभिड दसिपौ’ व अमेरिकां वइपिन्सं ‘सीडीसी’ कार्ड उपलब्ध याकेमाः । तर, यात्रा याये न्ह्यः व बेलायत वःगु निन्हुगु दिनय् धाःसा यात्रुतय्सं अनिवार्य पीसीआर परीक्षण याकेमाः ।
लिपांगु इलय् बेलायत दुहां वनेबलय् फ्रान्सबाहेकया ‘एम्बर लिष्ट’ अन्तर्गतया देशं वइपिं यात्रुतय्सं आइसोलेशन च्वनेम्वाःलीगु जूगु दु । न्हूगु नियमलिसें ताः इलंनिसें थः परिवार लिसे तापानाच्वंपिनि नापलायेगु ह्वःताः चूलाइगु सरकारं धाःगु दु ।
लिपांगु इलय् बेलायतय् कोरोना संक्रमण दर अप्वःसां उकिया लिच्वः म्ह्वः खनेदुगु धकाः सरकारं जनजीवन सामान्य दयेकेत प्रतिबन्धत चीकागु धाःगु दु ।
Categorized in अन्तर्राष्ट्रिय
