बेलायतय् लकडाउन स्ववाःया नितिं तन
लहना न्यूज | ने.सं. ११४० चौलागा नवमि (१७ अप्रिल २०२०), शुक्रवाः
बेलायतं कोरोना भाइरस (कोभिड–१९) संक्रमण नियन्त्रणया नितिं लकडाउन स्ववाः तनेगु क्वःछ्यूगु दु ।
विदेशमन्त्री डोमिनिक राबं म्हिगः विहिवाः प्रधानमन्त्री ज्याकू टेन डाउनिङ स्ट्रीटय् ग्वसाः ग्वःगु न्हियांन्हिथं कोरोनायात कयाः जुइगु ब्रिफिङया झ्वलय् ‘लकडाउन’ तनागु घोषणा यानादीगु खः ।
कोभिड–१९ न्यना वनेगु शुरु जुइधुंकाः वंगु मार्च २३ तारिखय् बेलायतय् न्हापांखुसी लकडाउन याःगु खः । न्हापांगु स्ववाःया लकडाउनया समीक्षा यायेधुंकाः संक्रमण अझ नं नियन्त्रणय् मवःगुलिं जनस्वास्थ्य व आर्थिक नोक्सानीपाखें बचय् यायेत ई तनेगु ज्या जूगु सरकारं न्ह्यथंगु दु ।
लकडाउन छ्वासुकल धाःसा आःतकया बलिदानी व प्रगति सितिं वनीगु नं विदेशमन्त्री राबं धयादीगु दु ।
न्हियांन्हिथं मृत्युदर कुहांवःगु अवस्थाय् बेलायतया राष्ट्रिय स्वास्थ्य सेवा (एनएचएस)पाखें संक्रमितया चाप फयेफइगु अवस्था, परीक्षण व ब्यक्तिगत सुरक्षा उपकरण (पीपीई) मागया सहज आपूर्ति, कोरोना भाइरस हाकनं न्यना वनेमफइगु अवस्था सुनिश्चित जुइधुंकाः लकडाउन छ्वासुकेफइगु मन्त्री राबया धापू खः ।
बेलायतय् कोभिड–१९या हुनिं थौं शुक्रवाः सुथय्तक अस्पतालय् जक १३द्वः ७५९म्ह सीधुंकूगु दु । केयर होमय् सीपिनिगु ल्याः उपलब्ध मदुनि ।
लकडाउन अवधिइ मज्जिमगाःगु नसाज्वलं न्यायेगु, न्हियांन्हिथंया ब्यायाम, वासः यायेगु व मज्जिमगाःगु सेवाय् ज्या याइपिं कर्मचारीपिं बाहेक मेपिन्त पिने वनेगु अनुमति बियातःगु मदु ।
सरकारया नियम नाला मकाःपिन्त दण्ड जरिवाना यायेत व हुलमुल चीकेत प्रहरीयात अधिकार बियातःगु दु । थौंकन्हय् व्यापार, व्यवसाय, स्कूल, विश्वविद्यालय फुक्कं बन्द जुयाच्वंगु दु ।
Categorized in अन्तर्राष्ट्रिय
