बैतडीइ जन्ती ज्वनावःगु जिप दुर्घटना जुयाः ६म्ह मनूत सीगु दु ।

दशरथचन्द नगरपालिका– २ देहिमाडौं जन्ती ज्वनाः दशरथचन्द नगरपालिका– ६ सिमायलपाखे वनाच्वंगु म १ ज ३१० नम्बरया जिप दशरथचन्द राजमार्गया गोठलापानी–झुलाघाट सडक खण्ड अन्तर्गत दशरथचन्द नगरपालिका– ४ कलुवाड मोडय् दुर्घटनाय् लाःगु खः ।

जिपय् दुपिं ७म्ह मध्ये ५म्ह घटनास्थलय् सीगु खःसा छम्ह वासः याकेत अस्पताल यंकाच्वंगु ईलय् सीगु धागु दु । दुर्घटनाय् लानाः तच्वयेक्क घाःपाः जूम्ह जिप चालकयात वासः याकेत धनगढी यंकाच्वंगु ईलय् लँपुइ हे सीगु बैतडीया प्रहरी प्रवक्ता प्रहरी निरीक्षक दर्शन खड्कां जानकारी बियादिल ।

दुर्घटनाय् लानाः ४८दँया राजेन्द्रबहादुर चन्द, ३८दँया धनबहादुर चन्द, ६५दँया प्रेमबहादुर चन्द, ६५दँ दुम्ह तारासिंह थापा, ५८दँ दुम्ह खेमसिंह कार्की व चालक डडेल्धुराय्च्वंम्ह ४०दँया दीपक माली खः ।

दुर्घटनाय् लानाः न दशरथचन्द नगरपालिका– ६ या ४८दँया हर्कबहादुर चन्द घाःपाः जूगु दु । जिप सडकं ७सः मिटर क्वये कुतुवंगु खः ।

Categorized in अपराध