ब्राजिलय् चिनिया ‘कोरोना भ्याक’ खोप बन्द
लहानान्युज | कौलागा एकादशी ११४०,कार्तिक २६ बुधवाः
कोभिड–१९ विरुद्ध चीनं निर्माण याःगु खोपं सहभागीपिन्त गम्भीर असर क्यःगु धाःसे ब्राजिलय् याना वयाच्वंगु ट्रायलयात स्वास्थ्यविद पिन्सं रोके याःगु दु। ब्राजिलियन स्वास्थ्य निरीक्षक अन्भिसाया कथं घटना २९ अक्टोबरय् जुगु खः। उकिया थप जानकारी सार्वजनिक याःगु मदुनि।
चिनियाँ कम्पनी साइनोभ्याक बायोटेकं निर्माण याःगु ‘कोरोना भ्याक’ खोप विश्वव्यापी रुपं विकसित खोपमध्ये लिपागु चरण ट्रायल याःगु खोप खः। उखे साइनोभ्याकं चाहिँ थःगु खोपया सुरक्षा सम्बन्धी थःत विश्वस्त दुगु धका धयावया च्वंगु खः। थुगु कम्पनीं चीनय् आपत्कालीन ज्याझ्वलय् अन्र्तगत द्धःछि मल्याक मनूतयेस छ्यले धुकुगु खः।
ब्राजिल कोरोना महामारी दकलय् अप्वो प्रभावित जुगु देय् मध्ये छःगु खः। अन संक्रमितपि ५६ लाख स्वया अप्वो थ्यःगु दु सा आःतक १ लाख ६३ हजार सी धुकुगु दु। थुकिया बारे सोमवाः अन्भिसा नं थःपिन्त छगू गम्भीर घटना पश्चात् ‘कोरोनाभ्याक’ खोपया क्लिनिकल ट्रायल रोके यायेगु निर्णयपाखे थ्यःगु दु धका धाःसे थुकियाबारे विस्तृत जानकारी बिःगु मदुनि।
थुगु हे खोपया अन्तिम ट्रायल इन्डोनेशिया व टर्की न जुया च्वंगु दु। अन जुयाच्वंगु छु न देय् या थज्यागु किसिमया शंकास्पद घटनाबारे खबर धाःसा मदु। इन्डोनेशियाया बायो फर्मा न मंगलवाः जक अन जुयाच्वंगु साइनोभ्याक खोप ट्रायलय् छु समस्या मदुगु व बालाक्क सञ्चालन जुयाच्वंगु धका रोयटर्सयात जानकारी बिःगु खः।
साइनोभ्याक न थ्व स्वयान्ह्यः याःगु बयानय् थःपिन्स निर्माण यानागु खोप कम्पनीया करिब दक्को हे कर्मचारी व उमिगु परिवारय् छ्यले धुकुगु धका धाःगु दु। व चिनियाँ स्वास्थ्य अधिकारीपिन्स न क्लिनिकल ट्रायलया थुगु खोपय् छुु न गम्भीर साइड इफेक्ट खने मदुगु धका जानकारी बिःगु खः।
Categorized in अन्तर्राष्ट्रिय
