ब्रेक्जिटयात कयाः बेलायती संसद स्थगन
बेलायती प्रधानमन्त्री बोरिस जोन्सनया संसद निलम्बन यायेगु क्वःछिनालिपा सांसद व अभियाकःमित आक्रोशित जूगु दु । जोन्सनया लिपांगु दिकेत स्वःगु अभियानय् १३गू लखस्वयां अप्वस्यां ल्हाःचिं तयेधुंकूगु दु । ब्रेक्जिटया ई क्वचाइगु छवाः न्ह्यः सेप्टेम्बर व अक्टोबरया न्यावाःया नितिं संसद निलम्बन यायेगु प्रधानमन्त्री जोन्सनया इनाप म्हिगः बुधवाः बेलायती महारानी एलिजाबेथं स्वीकृत यानादीगु खः ।
 
प्रधानमन्त्रीया प्रस्ताव महारानीं स्वीकार यायेधुंकाः बेलायती राजनीतिं न्हूगु मोड काःगु दु । राजनीतिक घोषणायात कयाः खास हे प्रतिकृया मबीगु ‘हाउस अफ कमन्स’या नेता जन बुर्कों संसद निलम्ब्न यायेगु पलाःयात संविधान उल्लंघनकथं ब्याख्या याःगु दु ।
 
जोन्सनया बेलातयी पलाखं राजनीति अझ विभाजित जूगु बेलायती सञ्चार माध्यमं न्ह्यथंगु दु । बेलायत यूरोपियन युनियनपाखें बिना सम्झौता हे थ्व हे अक्टोबर ३१ तारिखय् बहिर्गमन (ब्रेक्जिट) जुइमाःगु अडानया सामना यायेत प्रधानमन्त्री जोन्सनं थुकथंया जोखिम काःगु खनेदु । वंगु बुधवाः बेलायतया प्रतिपक्षी दलतसें बिना सम्झौता ईयूपाखें पिहां वयेगु पलाः विरुद्ध छप्पँ जुइगु व संसदय् कानूनीकथं पास जुइकथं विधेयक हयेत सहमति याःगु खः । बहुमत बेलायती सांसदत धाःसा विना सहमति ईयूपाखें बेलायत पिहां वयेगु पक्षय् मदु ।
 
न्हूगु सरकारया कार्ययोजना व नीतिया नितिं वइगु सेप्टेम्बरया निगूगु वाःनिसें न्यावाःतक संसद स्थगन याःगुलिं थ्व छुं राजनीतिक चाल मजूगु प्रधामन्त्री जोन्सनं धयादीगु दु । बिबिसीकथं हाउस अफ कमन्स नेता ज्याकोब रेस–मोगं धाःसा प्रधानमन्त्रीया पलाःया बचाउ यासें विरोध पाय्छि मजूगु धयादिल । विपक्षीतसें प्रधानमन्त्रीया न्हूगु पलाः प्रजातान्त्रिक मूल्य व मान्यता अःखः जूगु धासें विरोध बुलन्द यायेगु उद्घोष याःगु दु । उमिसं क्वःछिनाया विरोध यासें प्रधानमन्त्रीया पलाखं सांसदतयुत ब्रेक्जिटलिसे स्वानाच्वंगु विषयस सहलह यायेत म्हो जक ई ब्यूगु धाःगु दु ।
 
लेबर पार्टी नेता जेरेमी कोर्बिनं बिना सम्झौता यूरोपेली संघपाखें पिहां वयेत सरकारं षडयन्त्र यानाच्वंगु दावी यानादिल । ब्रेक्जिटयात कयाः संसदय् कानून पारित यायेत माःकथंया ई मतःगु वय्कःया दावी दु । प्रधानमन्त्री जोन्सनं बेलायती प्रजातन्त्रयात हे प्रहार याःगु धयादिसें कोर्बिनं सरकारयात कयाः अविश्वास प्रस्ताव दर्ताया तयारी यायेगु ख्याच्वःतकं बियादिल ।
 
संसद स्थगन यायेगु सरकारी घोषणा लिपा हे बेलायती संसद भवन न्ह्यःने नारा जुलुसलिसेंया ब्वज्या शुरु जूगु दु । लिपांगु क्वःछिनायात कयाः असहमत प्वंकूसें स्कटिस टोरी नेता रुथ डेभिडसनं राजीनामा बियादीगु दु ।
 
ईयूया कट्टर विरोधीतसें धाःसा प्रधानमन्त्री जोन्सनया वंगु स्वदँ न्ह्यःनिसें अनिर्णयया बन्दीकथं जुयाच्वंगु ब्रेक्जिट सार्थक जुइत्यंगु धासें समर्थन याःगु दु । प्रधानमन्त्री जोन्सनं छुं नं हालतय् ईयूपाखें बेलायत ३१ अक्टोबरय् अलग जुइगु घोषणा तःक्वःमछि हे यानादीगु खः ।