थौं हरिबोधनी एकादशी, हिन्दू धर्मावलम्वीतय् भगवान विष्णुया आराधना व तुलसी विवाह यानाः थुगु दिं हनाच्वंगु दु ।

असार शुक्ल एकादशी अर्थात हरिशयनी एकादशीया दिनय् प्यूगु तुलसीया थौं इहिपा यानाबीगु चलन दु । तुलसीया मठयात छाय्पियाः पवित्र तीर्थस्थलया जलं तुलसीयात म्वःल्हुयाः तु, साः, वंगलसिमा वा पंया यःसिँलिसे तुलसीया इहिपा याकेगु चलन दु ।

तुलसीया इहिपाया कन्हय्कुन्हु द्वादशीया दिनय् तुलसी पूजनलिसें थुकिया विसर्जन याइ । हरिबोधनी एकादशीया दिनय् विशेष यानाः साखः, सकि, कन्दमूल व सिसाबुसा नयेगु चलन दु । तुलसी पुजनया विसर्जन धुंकाः चतुर्मास अपसं नं क्वचाइ । भगवान् विष्णु क्षीर सागरय् द्यनाच्वनीगु विश्वास याइगु थुगु प्यलाया इलय् इहिपा, व्रतबन्ध थुज्वःगु छुं नं भिंगु ज्या याइमखु ।

हरिबोधनी एकादशी धुंकाः धाःसा दक्वं कथंया मंगल अले भिंगु ज्या न्ह्याइ । हरिबोधिनी एकादशीयात दच्छिन्यंकया २४ एकादशीमध्ये दक्कले महत्वपूर्ण एकादशीया रूपं कायेगु याः । बोलीचालीया भाषाय् थुकियात तःधंगु एकादशी नं धाइ । महाभारतय् गबलें द्यांलानाः मच्वनीगु भीमसेन नं थुगु दिनय् अपसं च्वंगु धइगु न्ह्यथनातःगु दु ।

अय्जुयाः मेगु दिनय् व्रत च्वनेमफुपिन्सं नं तःधंगु एकादशीइ अपसं च्वनेमाः धइगु मान्यता दु । हिन्दू धर्मय् एकादशीयात भगवान् विष्णुया उपासना यायेगु दिंया रूपं काय । भविष्य पुराणय् थुगु एकादशीया महिमा न्ह्यथनातःगु दु ।

हरिबोधनी एकादशीया दिनय् नेपालया थीथी धार्मिक थासय् मेला जुइगु याः । येँया भुइजःसि, सुनसरीया बराह क्षेत्र, तनहुँया देवघाट, गुल्मीया रिडी, पर्वतया सेतीवेणीइ विशेष मेला जुइगु याः । स्वनिगःया प्यंगू दिशाय् दुगु चार नारायण देगः चाँगुनारायण, विशंखुनारायण, इचंगुनारायण व शेषनारायणय् नं थौं विशेष मेला जुइ ।

एकादशी अपसं च्वनेबलय् मनूतय्त गबलें नं संकट जुइमखु धइगु विश्वास दु । लिपांगु इलय् चिकित्सकीय मालेज्याय् नं उपवासं उसाँय्यात सन्तुलित याइगु पुष्टि यायेधुंकाः अपसं च्वनीपिं अप्वयावःगु दु ।

Categorized in राष्ट्रिय