भारतं क्लिन स्विप
लहनान्युज | गुंलागा अष्टमी ११३७ (अगष्ट १५ २०१७)
श्रीलंकाया पालेकेले रंगशालाय् जुगुु भारत व श्रीलंकाया दथुइ स्वंगु टेस्ट क्रिकेटया सिरिज भारतं त्याकेत ताःलागु दु । भारतंं थुगु टेस्ट स्वंन्हुया दुने हे त्याकुगु खः ।
स्वंगुगु टेस्ट सिरिजय् दकलय् लिपांगु कासाय् भारतं ४८७ रन न्हापांगु इनिङय् दयेका श्रीलंकायात छगु इनिङ व १७१ रन बुकेत ताःलागु खः । श्रीलंका धाःसा न्हापांगु इनिङय् १३५ रन दयेका फ्लो अन यायेत बाध्यत जुगु खःसा निगुगु इनिङय् १८१ रन दयेका अलआउट जुगु खः ।
भारतं थ्व हे न्हापांगु बिदेशी भूमिइ दकलय् न्हापागु क्लिन स्विप खः । थुगु कासा धूका भारत बिश्व क्रिकेटय् १ ल्याखय् लागु दु ।
श्रीलंका थ्व नाप टेस्ट क्रिकेटय् क्लिन स्विप जुगु धाःसा निक्वःगु खः । थ्व स्वया न्ह्यः सन् २००४ य् अष्टेलियां स्वंगुगु टेस्टया कासाय् ३–० बुकुगु खः ।
