भारतं पिथंगु नक्सायात कयाः सांसदतसें कूटनीतिक पहल यायेत इनाप
लहना न्यूज | ने.सं. ११४० कछलाथ्व नवमि (६ नोभम्बर, २०१९), बुधवाः
भारत सरकारं पिथंगु न्हूगु नक्साय् नेपाःया भूभाग दुथ्याकेधुंकाः सांसदतसें सरकारया ध्यानाकर्षण याकूगु दु । उमिसं तत्काल कूटनीतिक पहल यासें नक्सा खारेज यायेत तकं इनाप याःगु दु
।
भारतं पिथंगु न्हूगु नक्साय् नेपाली कांग्रेसं गम्भीर ध्यानाकर्षण जूगु न्ह्यथंगु दु । कांग्रेस सांसद डिला संग्रौलां नेपाःया भूमियात अतिक्रमण यानाः नक्सा प्रदर्शन यायेगु अधिकार भारतयाके मदुगु धयादिसें सरकारयात कूटनीतिक पहल यायेत धयादिल । वय्कलं नेपाःया भूमि अतिक्रमण यानाः नक्सा प्रदर्शन यायेगु सुंयात नं अधिकार मदुगु धयादिसें सरकारयात थुगु विषयस प्रष्ट यायेत इनाप यानादिल ।
गृहमन्त्रीयात थुगु विषयस न्ह्यसः तयागु धयादिसें वय्कलं नेपाःया भूमियात आक्रमण व सीमा क्वत्यलाः भारतं नक्सा सार्वजनिक याःगु इलय् सरकार सुम्क च्वनाच्वंगुलिं न्ह्यसः दंगु धयादिल । वय्कलं राष्ट्रिय सवालया विषय जूगुलिं तत्काल राष्ट्रिय समहमतिया लकस दयेकाः फुक्क दलया मुँज्या सःतेत नं इनाप यानादिल । थुगु विषयस सरकारं संसदया विशेष अधिवेशन नं सःतेमाःगु संग्रौलाया धापू खः ।
नेकपाया सांसद झपट रावलं सरकारयात तत्काल कूटनीतिक पहल यानाः थःपिनिगु भूमि याकनं हे लित कायेत इनाप यानादिल । वय्कलं धयादिल, ‘ताःई न्ह्यःनिसें भारतीय विस्तारवादी नीति विरुद्ध राष्ट्रवादी देशभक्तपिन्सं सः थ्वयेकाच्वंगु इलय् भारतं नेपाःया ३७०गू वर्ग किलोमीटर भूभाग थःगु नक्सादुने तःगु दु । थुगु पलाः विरुद्ध न्ह्यज्यायेत फुक्क देशभक्तपिन्त अपील यानाच्वना ।’
नेपाल मजदुर किसान पार्टी (नेमकिपा)या सांसद प्रेम सुवालं भारतं नेपाःया भूभाग दुथ्याकाः पिथंगु नक्सा खारेज यायेत माग यानादिल । वय्कलं नेपालं तत्काल कूटनीतिक माध्यमपाखें अन्तर्राष्ट्रियकरण यायेमाःगु धयादिल ।
राज्य व्यवस्था समितिया सभापति शशि श्रेष्ठं लिपुलेक व कालापानीया विषयस म्हिगः मंगलवाःया मुँज्याय् नं सः तःगु खः । वय्कलं नेपाःया भूमि क्वत्यःगु विषय राष्ट्रियता, सम्बेदनशीलता व सार्वभौमिकतालिसे स्वाःगुलिं समितिइ गम्भीर सहलह यायेगु तयारीइ दुगु नं धयादिल ।
Categorized in राष्ट्रिय
