भारतय् नं सायात राष्ट्रिय जनावर घोषणा यायेत अदालतया आदेश
गुंलागा एकादशी ११४१, भाद्र १७ बिहीवाः
भारतया इलाहावाद उच्च अदालतं सायात राष्ट्रिय जनावर घोषणा यायेत आदेश ब्यूगु दु । गौहत्याया द्वपं फयाःवःम्ह जावेद नांया मनूया मुद्दायात सुनुवाइ यायेगु झ्वलय् इलाहावाद उच्च अदालतं थन्यागु आदेश जारी यानाब्यूगु खः ।
अथेहे सायात संरक्षण बीमाःगु मौलिक अधिकारदुने तयेत न अदालतं धागु दु । देय्या संस्कृतिइ आघात लाइबलय् देय् कमजोर जुइ धइगु यथार्थ खँयात मनन यानाः सायात राष्ट्रिय जनावर घोषणा यानाः संरक्षण यायेत उच्च अदालतं धागु खः । अदालतं गौहत्याया द्वपं फःम्ह जावेदयात जमानतय् मत्वःतेत न धागु दु ।
अदालतं सा स्यानाः नयेदयेमाःगु धइगु विषयया विरुद्धय् आदेश न्यंकूसें थन्यागु ज्यापहः जूसा साया मौलिक अधिकार हनन जुइगु ठहर याःगु दु । बरु स्यायेगु थासय् अधिकार संरक्षण यायेमाः धकाः धागु दु । हिन्दुतय्गु जक मखु मुस्मांतयेगु शासनकालय् न भारतय् साया महत्व स्वीकार याःगु धासें गौहत्यायात छुं न त्वहलय् जायज धाये मफइगु अदालतया ठहर दु ।
Categorized in अन्तर्राष्ट्रिय