कोरोना भाइरसया महामारी थप फैलै मजुइकेत भारतया थीथी राज्यमा कर्फ्यु लगे याःगु दु।

दक्षिण पश्चिमी राज्य कर्नाटकय् चान्ह्यः निसे लागू जुइ कथं कर्फ्यु लगे याःगु दु । कर्नाटक् वःगु पुस १८ गते तक लागू जुइ कथं म्हिगः चान्ह्यनिसे कर्फ्यु सुरु याःगु दु ।

कर्नाटकया स्वास्थ्यमन्त्री डाक्टर के सुधाकरं चान्ह्यनिसे पिहा मवयेत व भीडभाड जुइ कथं छु न गतिविधि मयायेत आह्वान यानादीगु खः। थ्व स्वयान्ह्यः महाराष्ट्र राज्यं कर्फ्यु लगे याये धुकुगु दु।

महाराष्ट्रय् लगे याःगु कर्फ्यु वइगु २१ गते तक लागू जुइ। न्हुगु वर्ष सन् २०२१ व क्रिसमसया इलय् भीडभाड व  चलहलपहल अप्वो जुया कोरोना महामारी थप फैलै जुइ फइगु अवस्थायात मध्यनजर यासे कर्फ्यु आदेश जारी याःगु धका भारतीय सञ्चारमाध्यमं धाःगु दु । भारतय् कोरोना सङ्क्रमितपि छगु करोड छगु लाख स्वया अप्वो जुइ धुकुगु दु ।

सङ्क्रमितपि मध्ये ९६ लाख ९२ हजार कोरोनामुक्त जुइ धुकुगु दु । भारतय् आःतक छगु लाख ४६ हजार स्वया अप्वो सङ्क्रमणया कारण ज्यान वने धुकुगु दु ।

Categorized in अन्तर्राष्ट्रिय