भारतीय एसएसबीं ट्विनया तार चाना बिउबले जयसिंह धामी महाकाली खुसिइ बेपत्ता
दिल्लागा अष्टमी ११४१,साउन १७ सोमवाः
नेपालं महाकाली खुसिया बच्छि भागय् थ्यंम्ह जयसिंह एसएसबीं भारतपाखे चिनातःगु तार चानाबीधुंकाः तारलिसें खुसिइ बेपत्ता जूगु खः ।
घटना जुइधुंकाः मदुम्हेसिया थःथितिपिन्सं स्थानीय प्रशासनय् उजुरी ब्यूगु दु । प्रशासनं धार्चुला प्रशासनयात पौ च्वःगु दु ।
थुगु घटना गोलिं कयेकूगु सरहया हे अमानवीय क्रूर हत्या खः धकाः सकसिनं धयाच्वंगु दु । प्यदँ न्ह्यः थ्व हे थासय् ताँ दयेकेगु बजेट फ्याःगु खःसां थौं तक छुं हे ज्या जुइमफुनि । तुईनया तारचाःम्ह लिसें ताँ दयेकेगु ठेक्का काःम्ह निम्हेसितं कारवाही जुइमाःगु सः आः दनाच्वंगु दु । थुकिया दथुइ सत्तारुढ नेपाली काँग्रेसं तकं घटनाया सत्यतथ्य छानबीन यानाः दोषीयात कारवाही यायेमाःगु धासें सरकारया ध्यान साःगु दु ।
थ्वहे दथुई भारतीय सुरक्षाकःमिं तुईन चानाः दार्चुलाया जयसिंह धामी महाकालीइ वेपत्ता जूगु घटनाय् थःगु ल्हाः मदुगु दावी भारतीय पक्षं याःगु दु । म्हिगः दार्चुलाया प्रमुख जिल्ला अधिकारीयात पौ च्वयाः भारतया पिथौरागढया जिल्ला अधिकारी आनन्द स्वरुपं घटनाय् एस.एस.बीया ल्हाः मदुगु दाबी याःगु खः ।
दार्चुलाया सहायक प्रमुख जिल्ला अधिकारी ज्योत्स्ना भट्ट जोशीं भारतं पत्र छ्वयाहःगु पुष्टि यानादिल । एसएसबीया टोली घटनास्थल थ्यने न्ह्यः हे दुर्घटना जुइधुंकुगु भारतीय पक्षया दावी दुगु नं दार्चुला जिल्ला प्रशासनं जानकारी ब्यूगु दु ।
थ्व हे दथुइ, धामी खुसिइ वेपत्ता जूगु घटना छाविन यायेत नेपाल सरकारं समिति गठन याःगु दु । थुखे, गृह मन्त्रालयं धाःसा घटनाया वास्तविकता सीकेत माःगु निर्देशन बीधुनागु धासें भ्रम न्यंकीगु बुखँ अले सुचं संप्रेषण मयायेत इनाप याःगु दु ।
Categorized in राष्ट्रिय
