२०८० चैत्र १६, शुक्रबार

भारतीय प्रहरीं कयेकूगु गोलिं नेपाःमि सित

लहनान्यूज | चिल्लाथ्व द्वादशी ११३७ (मार्च ९ २०१७)

कञ्चनपुरया नेपाल भारत सीमावर्ति क्षेत्र पुनर्वासय् भारतीय प्रहरीं कयेकूगु गोलिं लानाः छम्ह नेपाःमि सीगु दुसा प्यम्ह घाःपाः जूगु दु ।
 
भारतीय प्रहरीया गोलिं लानाः पुनर्वास नगरपालिका ८ याम्ह २५दँयाम्ह गोबिन्द गौतम सीगु खः । गोलिं लाःम्ह गौतमयात धनगढीस्थित अस्पताल यंकूबलय् चिकित्सकं मृत घोषणा याःगु खः ।
 
पुनर्वासया दशगजा क्षेत्रय् कलभर्ट दयेकेगु झ्वलय् विवाद जूबलय् भारतीय प्रहरीं नेपाःमिपिन्त गोलिं कयेकूगु स्थानीयं धाःगु दु । भारतीय सुरक्षाकःमिलिसें वःपिं भारतया सीमावर्तिया स्थानीयं नेपाःमिपिन्त अप्पां कयेकूगु स्थानीयया धापू दु ।
 
छुं ई न्ह्यः उगु क्षेत्रय् आःयात खुसि च्वय्  कच्ची कलभर्ट दयेकेत भारतीय व नेपाली अधिकारीतय् दथुइ सहमति जूगु खः । व हे कथं म्हिगःनिसें पुनर्वास नगरपालिकां कलभर्ट दयेकेगु ज्या न्ह्याकूगुलिइ भारतीय सीमा सुरक्षा बलं थुनाब्यूगु खः । 
 
कलभर्ट थुनाब्यूगु विरोधय् ब्वज्या यानावंगु नेपाःमितय्त भारतीय प्रहरीं गोलिं कयेकूगु धाःगु दु । वंगु चान्हय् ल्वाभःलिसें वःपिं भारतीय एसएसबीया जवानतयसं नेपाःमिपिन्त छेँ त्वःताः वनेत ख्याच्वः ब्यूगु नं स्थानीयं धाःगु दु ।
Categorized in राष्ट्रिय