भारतीय राष्ट्रपति नेपालय्
भारतया राष्ट्रपति प्रणव मुखर्जी स्वन्हुया राजकीय भ्रमणया लागिं बुधबार येँय् थ्यंकः झाःगु दु ।
 
भारतीय वायुसेनाया विशेष विमानं राष्ट्रपति मुखर्जी येँय् झाःगु खः । राष्ट्रपति विद्यादेवी भण्डारीं त्रिभुवन अन्तर्राष्ट्रिय विमानस्थलया  अति विशिष्टकक्षय् भारतीय समकक्षीयात लसकुस यानादिल ।
 
उपराष्ट्रपति नन्दबहादुर पुन, प्रधानमन्त्री पुष्पकमल दाहाल, परराष्ट्रमन्त्री डा. प्रकाशशरण महतलिसेंया मन्त्रीतयसं नं भारतीय राष्ट्रपतिया विमानस्थलय् हे वनाः लसकुस याःगु खः । भारतीय  राष्ट्रपतियात लसकुस यायेत नेपाली सेनाया टुकडीं विमानस्थलय् २१ तोपया सलामी ब्यूगु खः ।
 
विमानस्थलय् कुहां वयाकथं भारतीय राष्ट्रपति मुखर्जी राष्ट्रपति विद्यादेवी भण्डारीलिसें हे राष्ट्रपति भवन शीतल निवास झाःगु खः । राष्ट्रपति भवन थ्यंकाःलि राष्ट्रपतिद्वय दथुइ द्विपक्षीय हित व थवंथवयया ग्वाहालिया विषयस करिब सवा घन्टा सहलह जूगु खः ।
 
राष्ट्रपति भण्डारीयात नापलायेधुंकाः भारतीय राष्ट्रपति मुखर्जी येँस्थित भारतीय दूतावासय् ग्वसाः ग्वःगु लसकुस ज्याझ्वलय् झाःगु खः ।