भारतीय विदेशमन्त्री जयशंकर भारत लिहांवन
भारतीय विदेशमन्त्री एस जयशंकर थःगु देस भारत लिहां झायादीगु दु ।
 
 
नेपाल–भारत संयुक्त आयोगया न्याक्वःगु मुँज्याय् ब्वति कायेत जयशंकर म्हिगः बुधवाः नेपाः झायादीगु खः । 
 
 
म्हिगः व थौं जूगु ज्याझ्वः क्वचायेकाः जयशंकर थौं भारत लिहां झायादीगु खः । वय्कःयात त्रिभूवन अन्तर्राष्ट्रिय विमानस्थलय् परराष्ट्र मन्त्रालयया सचिव शंकरदास वैरागी, नेपाःया नितिं भारतीय राजदूत मञ्जिवसिंह पुरीं बिदाइ यानादीगु खः ।
 
 
नेपाल च्वनेगु झ्वलय् जयशंकरं म्हिगः प्रधानमन्त्री केपी शर्मा ओलीयात नापलानादिलसा सनिलय् राष्ट्रिय जनता पार्टीया अध्यक्ष मण्डलया नेतातलिसे नापलानादिल ।
 
 
अथे हे, थौं विहिवाः सुथय् राष्ट्रपति विद्यादेवी भण्डारीयात वय्कलं नापलानादिल । 
 
 
थ्व हे झ्वलय् नेपाली कांग्रेसया सभापति शेरबहादुर देउवा, उपप्रधानलिसें स्वास्थ्य मन्त्री व समाजवादी पार्टी नेपालया नायः उपेन्द्र यादव, मेम्ह नायः डा. बाबुराम भट्टराईयात नाप  लाना दिल । उमिसं विदेशमन्त्री जयशंकरयात वय्कः च्वनादीगु होटेल द्वारिकाजय् नाप लानादीगु खः ।
 
 
तर, प्रोटोकलकथं छुं नं देसया विदेशमन्त्रीयात होटलय् वनाः नापलाये मज्यूगु धयादिसें पुलांपिं प्रधानमन्त्रीत पुष्पकमल दाहाल व माधवकुमार नेपालं धाःसा जयशंकरयात नापलानामदी ।

 

Categorized in राजनीति