भारत च्याक्वखुसि साफ च्याम्पियन जुल
कौलाथ्व द्वादशी, ११४१, आइतबाः
नेपाःयात बुकाः भारतं साफ च्याम्पियनसीप फुटबलया उपाधि त्याकूगु दु ।
माल्दिभ्सया राजधानी मालेय् वंगु चान्हय् जूगु फाइनल कासाय् नेपाःयात ३–० गोल अन्तरं बुकाः भारत, च्याक्वखुसि साफ च्याम्पियन जूगु दु ।
भारतं कासा त्याकूबलय् कप्तान सुनिल क्षेत्री, सुरेश सिंह वाङजाम व साहल अब्दुल समादं छगोल–छगोल याःगु खः । न्हापांगु हाफय् गोल मजूसां भारतं निगूगु हाफय् मदिक्क स्वगोल नकूगु खः ।
कासा बूगुलिसे नेपाःया साफ च्याम्पियन जुइत लक्ष्य पूमवन । नेपाः साफ च्याम्पियनसीप फुटबलया उपविजेता जूगु थ्व न्हापांखुसि खः । साफ च्याम्पियनसीप फुटबलया थ्व १३गूगु संस्करणय् न्यागू देशं ब्वति काःगु खः ।
राउण्ड रोबिन लिगया लिधंसाय् भारत व नेपाः थुगुसिइया साफ च्याम्पियनसीप फुटबलया फाइनलय् थ्यंगु खः ।
Categorized in कासा