भारत व चीनं निगू देय्या सैनिक दथुइ संचार यायेत हटलाइन पलिस्था
दिल्लागा दशमी ११४१,साउन १९ मंगलबाः
भारत व चीनं निगू देय्या सैनिक दथुइ संचार यायेत सिक्किमया सीमावर्ती क्षेत्रय् हटलाइन पलिस्था याःगु दु ।
उत्तरी सिक्किमया कोङ्ग्रालाय् दूगु भारतीय सैनिक व तिब्बतया खाम्बा जोङय् दूगु जनमुक्ति सेना दथुइ स्वापू तयेत हटलाइन सेवा न्ह्यागु भारतीय सञ्चारमध्यमतयेसं न्ह्यथंगु दु ।
हटलाइनया उलेज्या यासें निगुलिं देय्या स्थानीय सैनिक कमाण्डरं हसना कालबिल याःगु खः । चिनियाँ जनमुक्ति सेना स्थापनाया हे दिं उगु हटलाइन न्ह्याकुगु खः ।
हटलाइनं मित्रता व एकताया हसना कालबिल जूगु भारतीय सेनां न्ह्यथंगु दु । करिब ३४ सः किलोमिटर सीमा निर्धारण जुइत ल्यं दूगु भारत व चीन दथुइ थगुने सीमानाय् तनाव अप्वःगु खः ।
थगुने गल्वान उपत्यकाय् जूगु ल्वापुइ निगुलिं देय्या सैनिक सीगु खः । लिपांगु ई निगुलिं देंशं तनावयात ज्यंकेत कुतः जुयाच्वंगु धाःगु दु ।
Categorized in अन्तर्राष्ट्रिय
