भिन्तुना गुथिया वसन्त उत्सव झःझः धाय्क क्वचाल
लहनान्युज | अष्टमी ११३८ (मार्च २५ २०१८)
असंया थाकुलियात सम्मान यासें भिन्तुना गुथि, असंया भिन्तुना वसन्त उत्सव ज्याझ्वः झःझः धाय्क क्वचाःगु दु ।
गुथिं थौं येँया असन न्याक्वःगु भिन्तुना वसन्त उत्सव ज्याझ्वःया ग्वसाः ग्वसें असंया थाकुलि १०४दँयाम्ह मोतिकृष्ण तुलाधरयात हंगु खः । उगु हे ज्याझ्वलय् छुं दिं न्ह्यःतिनि क्वचाःगु स्थानीय तहया निर्वाचनय् येँ महानगरपालिका वडा ल्याः २५पाखें वडाअध्यक्ष निर्वाचित नीलकाजी शाक्य व वडा नम्बर २७ पाखें वडाअध्यक्षय् निर्वाचित चिनियाँमान बज्राचार्ययात नं बधाई लिसें हंगु खः ।
सम्मानित स्वम्हेसितं गुथिया संस्थापक नायः कृष्णमान तुलाधरं दोसल्लां न्ययेकाः हनादिल सा गुथिया वर्तमान नायः उपेन्द्रकाजी शाक्यं हनापौ लःल्हानादिल ।ज्याझ्वलय् सम्मानित वडाध्यक्षद्वय शाक्य व बज्राचार्यं येँया प्राचीन बजार असंयात आः आधुनिकीकरणपाखे यंकुसें थुकिया पराम्परागत पहिचानयात नं ल्यंका तयेमाःगु धयादिल ।
येँया पर्याय थें हे जुयाच्वंगु थनया प्राचीन वस्ती असंया परम्परागत संस्कृति, सम्पदाया अध्ययन अनुसन्धान यासें थुकिया संरक्षण यायेगु नितिं थःपिं न्ह्याःवनेगु प्रतिवद्धता वडाअध्यक्षद्वय शाक्य ज बज्राचार्यं प्वंकादिल ।
व स्वयां न्ह्यवः असंया थाकुलि १०४दँयाम्ह मोतिकृष्ण तुलाधरं त्वाःदेवाय् मत च्याकाः ज्याझ्वःया औपचारीक उलेज्या यानाद्यूगु खः । ज्याझ्वलय् गुथिया नायः उपेन्द्रकाजी शाक्यं लसकुस यानादिल सा गुथिया छ्यान्जे अमुलकाजी तुलाधरं सुभाय् देछानादिल ।
ज्याझ्वलय् थीथी सांस्कृतिक न्ह्यब्वयाया लिसें कविता वाचन व ख्यालः नं न्ह्यब्वःगु खः । सांस्कृतिक न्ह्यब्वयाया झ्वलय् १५०दँ पुलांगु दाफा भजन, मृदंग भजन, ज्ञानमाला भजन, मोडर्न नेवाः इंगलिस स्कूलया विद्यार्थीपिनिगु हुलाप्याखं, जाय्ज संगीतय् कत्थक हुलाप्याखं नं न्ह्यब्वःगु खः ।
लिसें इमेज च्यानलष लोकंव्हाःगु नेपालभाषाया ज्याझ्वः समयबजि पुचःया ख्यालः, भीम तुलाधर, प्रवेशमान शाक्य लिसेंया लोकं व्हाःपिं म्येहालामिपिनिगु म्ये नं न्ह्यब्वःगु खः ।
स्थानीय भाषा, कला, संस्कृतिया संरक्षणया लिसें स्थानीय न्हूपिं प्रतिभापिनिगु नितिं दबूया विकास यायेगु आज्जुं गुथिं भिन्तुना वसन्त उत्सव ज्याझ्वःया ग्वसाः ग्वया वयाच्वनागु, ज्याझ्वः कजि विद्यासागर तुलाधरं जानकारी बियादिल ।
गुथिं थ्व स्वयां न्ह्यवः नेपाल सम्वत ११२९, ११३०, ११३१ व ११३६य् नं वसन्त उत्सव ज्याझ्वःया ग्वसाः ग्वयेधुंकल । थुकिया लिसें गुथिं दँय्दसं नेपालभाषाया उत्थानय् योगदान ब्यूपिं भाषासेवीपिनिगु किपा कियातःगगु पाँय्म्वः नं पिथना वयाच्वंगु दु ।
