भुल्खु टोल सुधारपाखें यलया उम्मेदवारपिनिगु परिचयात्मक ज्याझ्वः
राजेश बज्राचार्य | ने. सं. ११३८ थिंलाथ्व पुन्ही (डिसेम्वर ३, २०१७) यल
यलय् चुनावी प्रचारप्रसारया तीव्रतानापं दलतयेगु ब्यागलं ब्यागलं जक आमसभा जुयाच्वंगु इलय् क्षेत्र नं २ (ख) या प्रदेशसभा व प्रतिनिधिसभाया उम्मेदवारपिनिगु न्हापांखुसी मंकाःकथं म्हसिका न्ह्यब्वयेगु ज्याः जूगु दु ।
यलया भुल्खु टोल सुधार समितिया ग्वसालय् आइताः वडा नं १६ ज्याकूथि दुगु यलया पुलाँगु धौगः बजाः दुने जूगु थुगु ज्इाझ्वःसं थुगुसीया निर्वाचनय् थीथी राजनैतिक दलपाखें प्रत्यक्ष उम्मेदवारी बियादिपिनिगु उपस्थिति दूगु खः ।
ज्याझ्वःसं क्षेत्र नं २या प्रत्यक्ष प्रतिनिधिसभा सदस्य उम्मेदवारपिं नेपाली काँग्रेसया चन्द्र महर्जन, नयाँ शक्ति पार्टी नेपालया रत्न महर्जन, विवेकशील साझा पार्टीया अमिर राज महर्जनं थःथःपिनिगु पार्टीया नीति व योजनाबारे नुगः खँ तयादीगु खः । अथेहे, क्षेत्र नं. २ (ख)पाखें प्रदेशसभा उम्मेदवारपिं बाम गठबन्धन प्रतिनिधि नेकपा एमालेया ज्ञानेन्द्र शाक्य, संघीय समाजवादी फोरमया नारायण डंगोल, नयाँ शक्ति पार्टीया लक्ष्मी श्रेष्ठ, विवेकशील साझा पार्टीया ज्ञान बहादुर शाक्य, चुरे भावर पार्टीया दुर्गामान ब्यञ्जनकार, एकीकृत राष्ट्रिय पार्टीया श्यामलाल श्रेष्ठपिंसं क्षेत्रया विकासयानितिं थःगु प्रतिवद्धता प्वंकादीगु खः ।
ग्वसाःखलःया नायः चन्द्र कृष्ण श्रेष्ठं देय्या थीथी राजनैतिक ह्यूःपा लिपा थुगुसीया निर्वाचनं आर्थिक सम्बृद्धिया ह्यूपाःपाखे उन्मुख जुइगु भलसा कासें सकल उपस्थित उम्मेदवारपिनित भिन्तुना देछानादिल । वयेकलं थुगु आशायात व्यवहारिक रुप बिइम्ह उम्मेदवारयात म्हसिकेगु व ह्यूपाःया एजेण्डाबारे मतदातायात स्पष्ट यायेगु ज्याझ्वःया तातुना खः धैदिल । ‘७०दँ दुने देयया राजनैतिक परिस्थिति हिल तर स्थानीय बजाःया केन्द्र जुइधूकुगु धौगः बजाःया स्वरुप हिलेमफुगु दसु ल्यंदनि’ वयेकलं धैदिल, ‘वैगु निर्वाचनया उम्मेदवारपिनिसं दलिय हैसियतसिबें जनअपेक्षा अनुरुप आर्थिक सम्बृद्धि जुइगु दीर्घकालीन नीति व व्यवस्था स्थापना यायेत ताःलायेमा, भिन्तुना ।’
ज्याझ्वःया अतिथिकथं ललितपुर उद्योग बाणिज्य संघया नायो कृष्णलाल महर्जनं सकता दलतयेगु साझा एजेण्डा आर्थिक बिकास व सम्बृद्धि जूगु न्ह्यथसें थुकियालागि नीजि क्षेत्र व उद्योग व्यवसायया लकस विकास अनिवार्य जुगुलिइ बः बियादिल । वयेकलं निर्वाचनपाखें हारजितया लिच्वःसिबें आर्थिक विकासया नितिं उम्मेदवारपिं सकलें निरन्तर न्ह्यज्यायेगु अपरिहार्य जुगु धैदिसें ललितपुर उद्योग बाणिज्य संघ सकलेंनापं सहकार्य यायेत तयार जुइ धैदिल ।
ज्याझ्वःसं धपगाः बजार व्यवस्थापन समितिया नायः महेश श्रेष्ठं स्थानीय परिवेशय् धौगः बजाःया इतिहास न्ह्यथसें पुनसंरचना व बिकासया नामय् पुलाँपिं उद्योग व्यवसायीपिनित बिस्थापित मखुसें आर्थिक सम्बृद्धियालागि सहकार्य याना न्ह्यायेगु आवश्यकता दु धयादिल ।
ज्याझ्वःया वक्तापिं दथुइ सकल नेपाःमिपिनिसं आः राजनैतिक ह्यूपाया नामय् अस्थिरता मखु आर्थिक विकासया लः पियाच्वंगु खँय् सहमत जूगु खनेदुगु खः । वक्तापिंमध्ये नेपाली काँग्रेस व बाम गठबन्धनया प्रतिनिधिपिन्सं नीति निर्माणनापं राजनैतिक स्थिरतायालागि स्पष्ट बहुमत माःगुलिइ बः बियादीगु खःसा नयाँ शक्ति लगायत मेगु दलया उम्मेदवारपिन्स देय्या बिकासयानितिं न्हूगु बैकल्पिक शक्तिया माग जुयाच्वंगु धाःसें थःपिन्त त्याकेत इनाप यानादिगु खः ।
