भ्याकेट निवेदनय् थौं सुनुवाइ
बछलाथ्वः द्वादशी ११४१, असार ८ गते मंगलबाः
नेकपा एमालें सर्वोच्च अदालतय् बिउगु भ्याकेट निवेदनया थौं सुुनुवाइ जुइत्यंगु दु । १०क्वःगु राष्ट्रिय महाधिवेशन आयोजक कमिटीं याःगु कारवाहीयात मान्यता बिइमाःगु धका एमालें सर्वोच्च अदालतय् भ्याकेटया निवेदन दर्ता याःगु खः ।
महाधिवेशन आयोजक कमिटी हे एमालेया वैधानिक निकाय जूगु दाबी यासें थुकथं निवेदन दर्ता याःगु खः । सर्वोच्च अदाललया न्यायाधीश प्रकाशमान सिंह राउतया याकः इजलासं वंगु जेठ २७ य् कर्णाली प्रदेशसभाया ४म्ह एमाले सांसदयात पुनर्बहाली यायेत अन्तरिम आदेश जारी याःगु खः ।
पार्टी केन्द्रीय कमिटीं कारवाही याये दइगु जूसा नं एमालेय् आः केन्द्रीय कमिटी मजुसें महाधिवेशन आयोजक कमिटी दूगुलिं महाधिवेशन आयोजक कमिटीं थुकथं कारवाही यायेगु मछिंगु आदेशय् उल्लेख यानातःगु खः । भ्याकेट निवेदनय् धाःसा महाधिवेशन आयोजक कमिटी हे कन्द्रीय कमिटीं दयेकुगुलिं थुकिं अधिकार छ्यले फइगु एमालेया तर्क दु ।
संसदीय व्यवस्थाय् दलया ह्वीप हाचांगाःसा पार्टीं कारवाही यायेफइगु धका भ्याकेटय् कर्णालीइ ४म्हसित याःगु कारवाही राजनीतिक दलसम्बन्धी ऐन कथं हे जूगु उल्लेख यानातःगु दु ।
थ्वहे दथुइ कर्णालीया ४म्ह सांसदया कारवाहीलय् अदालतं याःगु फैसलाविरुद्ध पुनरावलोकनय् वनेगु पार्टीया निर्णयप्रति एमालेया खनाल नेपाल पुचः सशंकित जूगु दु ।
अदालतया आदेशय् पुनरावलोकन यायेत स्वःगुलिं एकताया विरुद्धय् नायः केपी शर्मा ओली हे न्ह्यानाच्वंगु उगु पुचःया ठहर दु ।
Categorized in राजनीति
