भ्याक्सिन वल, झीगु ल्हातय् लाइ ला ?
राज
थौंया दिनय् स्वल धाःसा न्हिं थुलि मनू संक्रमित जुल, थुलि सित, थुलि लन धइगु अङ्क व ल्याःचाःया दथुइ हे मुक्कं हलिंबासीया जीवन न्ह्यानाच्वंगु दु । थुकिया दथुइ छगू न्हूगु व लसताया खँ धाःसा वःगु दु । कोरोना भाईरस (कोभिड १९) विरुद्धया भ्याक्सिन वितरण शुरु जुल ।
वंगु दँ २०१९ या डिसेम्बरय् चीनया उहान शहरय् नं पिहांवःगु कोरोना संक्रमणया खँय् उगु इलय् ला सुनां खास च्यूताः मतः । मेगु देय्यात व भाइरस खनाः ग्याय्माःगु स्थिती दुगु मखु । छाय्कि व चाइनाया छगू शहरय् जक खनेदुगु खः । थुलि तक्क कि चीनया जःलाखला देय् जुयाः नं नेपालयात तकं थुगु भाईरसयात कयाः उलि च्यूताः मदु । चाइनां पिहांवनाः दक्कले न्हापां थुगु भाईरस दुहांवंगु देय् धाःसा नेपाल हे खः हानं । थथे खयाः तक नं नेपालं उगु इलय् उलि च्यूताः मतः । तर जब थ्व भाइरसं विश्व महामारीया रुप काल, उबले धाःसा सकलें ग्यात ।
लकडाउन, स्टे एट होम, निषेधाज्ञा, कफ्र्यू छु छु उपाय नालाः मनूतय्त छेँय् तय्फइ, व सकतां यात । तर थ्व उपाय धइगु ला अल्पकालीन जक खः । दीर्घकालीन समाधान धइगु ला भ्याक्सिन हे खः । तर भ्याक्सिन गबले खः गबले ! भ्याक्सिन बजारय् वय्त छुं मखुसा दत्या, निदँ बी धयाच्वंगुलिइ आः दच्छि दुने हे भ्याक्सिनया वितरण शुरु जूगु सकारात्मक पक्ष खः ।
दक्कले न्हापां रुसं भ्याक्सिन दय्कागु दावी याःसां विश्व स्वास्थ्य संगठनं थुकियात मान्यता मब्यू । आः वयाः फाइजर कम्पनीया भ्याक्सिन बहरानइन, ब्रिटेन तक्क थ्यनेधुंकल । लिसें फाइजर लिसें बायोटेक कम्पनीया भ्याक्सिनया वितरण संयुक्त राज्य अमेरीकाय् नं म्हिगःनिसें शुरु जुल । नेपालय् नं भ्याक्सिन हय्त ज्या तच्वय्धुंकूगु नेपाल सरकारं दावी यानाच्वंगु दु । खतुं भ्याक्सिनया खँय् वैज्ञानिकतय्सं हे नं न्ह्यसःत थनाच्वंगु दनि ।
९५ प्रतिशततक्क प्रभावकारी धयातःगु थुगु भ्याक्सिन धात्थें गुलित प्रभावकारी जुइ, थ्व भ्याक्सिनं गुलि ईतक्क ज्या याइ, थुगु भ्याक्सिनया साइड इफेक्टया खँ आदि आदि वैज्ञानिकतय् दथुइ नं शंका दनि । उकिया नापं नेपालय् धाःसा भ्याक्सिनयात कयाः मेगु हे शंका दु । थुगु भ्याक्सिन गबलेतक्क गुलि ल्याखय् दुतहइ ? थुगु भ्याक्सिनया मू गुलि तुइ जुइ, नेपालीतय्सं न्याय् फइला मफइला ?
भ्याक्सिन आवश्यक मनूतय्गु ल्हातय् लाइ कि मलाइ, कि पहुँचवालातय्सं हे फुकाबीगु खः ला कि ? भ्याक्सिनलिसें थीथी कथंया जिज्ञासा, न्ह्यसः, शंका दंगु दु । सारा विश्वया मनूतय्त प्रभावित याःगु थुगु भाइरसपाखें याकनं मुक्ति चुलाय्मा, थुगु भाइरस विरुद्धया खोप याकनं नेपालय् दुहांवयाः पाय्छि ढङ्गं वितरण जुयाः आवश्यक मनूतय्गु ल्हातय् लाय्मा, झीसं थ्व हे मनंतुने।
